Владата и надлежните институции работат на решавање на проблемот со депонијата Дрисла, а од денеска во депонијата влегува и полицијата, рече денеска премиерот Христијан Мицкоски, по промовирањето на изборната коалиција и потпишувањето на документот „Декларација за Македонија на граѓаните и за општини што создаваат иднина“.

Според Мицкоски чудно е како во одредени јавни претпријатија каде што свои кадри има ДУИ се случуваат вакви работи, бидејќи како што рече вчера бил изгаснат пожарот а доцна во ноќта повторно се распламтил. Полицијата сега ќе се занимава со пронаоѓање на виновниците, порача тој.

„Како влада и институции ги преземеме сите мерки, да немате дилема. За Вардариште имаме осомничени лица, кои се приведени и за кои се покажа дека ја користеле илегалната депонија да произведуваат метали, за подоцна нелегално да ги продаваат. Таму од вчера има приватно обезбедување ангажирана од неколку општини, обезбедивме градежна механизација и ќе биде во полн состав и Вардариште е обезбедено, останува Дрисла.

Што се однесува до Дрисла, беше санирана вчера, но од некои чудни причини пред крајот на ноќта повторно се распламна, и денеска таму ќе се позанимава МВР. На линија сме со директорот на Дирекцијата за заштита и спасување, и очекувам проблемот да биде саниран. Јас сочувствувам со секој граѓанин кој го чувствува сето ова, но чудно е како во одредени јавни претпријатија каде што свои кадри има ДУИ се случуваат вакви работи. И тоа ќе го истражиме, и ќе обезбедиме соодветни докази како пожар кој беше ставен под контрола, одеднаш повторно да се распламти. И како сега кога успешно се справивме со пожарите, и покрај диверзиите, одеднаш да се случува сега повторно пред локалните избори. Вистинското прашање е кому сето ова му одгоовара“ праша Мицкоски.

Тој најави дека ќе се откријат виновниците и дека ќе одговараат за стореното.

Утрово во повеќе делови Скопје беше загадено и обвиткано во магла.

„О2 иницијатива“ со петиција бара „Дрисла“ да остане во надлежност на Град Скопје