Факт за кој политичарите се сложуваат кога зборуваат за Охридскиот рамковен договор е дека тој донесе мир во Македонија кој 23 години потоа не е нарушен иако имало обиди за дестабилизација, а такви се најавуваат и во наредниот период откако опозицискиот Европски фронт предводен од ДУИ не влезе во владата на Мицкоски.

На паралелната прослава на 23-годишнината од потпишувањето на Охридскиот рамковен договор, најмногу аплауз од присутните членови и симпатизери на опозицискиот Европски фронт доби говорот на лидерот на ДУИ Али Ахмети кога им порача на македонските власти да не ги делат Албанците на добри и лоши зошто ако нема добри односи со нив, Македонците како нација нема да постојат.

-Нека чујат сите оние што мислат дека нас Албанците можат да не поделат на добри Албанци и лоши Албанци. Ние од Фронтот сме лошите Албанци кои бараме правдина. Ние нема да бидеме аргати на никого. Без разлика ако некој мисли дека е ага во оваа земја и дека ги има слугите позади него. Оваа држава ќе оди напред со добри меѓуетнички односи пред се помеѓу двете поголеми заедници како што се Македонците и Албанците. Македонците како нација можат да напредуваат само во комуникација и усогласеност и добри односи со Албанците инаку ќе ги голтнат Србите, Бугарите и Грците. Ова не ви го велам само на вас туку и на сите други македонски политички претставници. Соживот, соработка може да ја зачуваме историјата, идентитетот, може да го зачуваат нивниот национален идентитет инаку се предодредени да не постојат воопшто, рече Ахмети на Академијата за легитимитет, одржана по повод годишнината од Рамковниот договор во хотелот Александар Палас.

На свечената седница во Владата премиерот Христијан Мицкоски говорејќи за придобивките од Рамковниот договор порача дека ова е заедничка татковина за сите, и дека заедничкиот патриотизам единствено значи градење на живот под еден ист кров, на права но и обврски и борба за подобар живот под исто небо. Проблемите се заеднички и така треба да се нудат и решенија за нив, рече премиерот и се осврна на злоупотребата на етничките теми.

-Многу долго одредени политички елити Рамковниот договор, но и етничките права воопшто како такви ги користат како прекривка за прикривање на своите лични и најчесто лукративни интереси, но и фактот дека предолго и преинтензивно етничките теми се злоупотребуваат, се градат кариери во тоа име додека реалниот живот, животот на оние кои подеднакво го делат секојдневието како и сите останати граѓани е се потежок и се понесреќен. За одредени политички партии Рамковниот договор е најдобар и се спроведува само под услов кога истите тие се на власт, веднаш потоа откако ќе бидат опозициска смислуваат критики и креативни решенија на негово надополнување но и различно читање во правата и обврските кои произлегуваат од него. Притоа заборавајќи колку е скапа цената на тој договор и дека тој договор меѓу другото е напишан и со многу страдања и жртви од сите страни и во извесна мера тоа е и непочит кон тие жртви кои ги има, ќе повторам од сите страни, порача Мицкоски.

Ахмети пак на Академијата ја предупреди албанска коалиција Вреди која влезе во владата на Мицкоски иако освои помалку гласови и пратенички места од коалицијата Европски фронт дека направиле фатална грешка и газат врз легитимноста на својот народ, но тие ќе продолжат да се борат за заштита на легитимитетот консултирајќи се со домашни и странски експерти.

-Овој момент нека ни послужи за мобилизација затоа што ние сме победници, затоа што ние сме со правдата и никогаш не сме работеле позади грб на народот и на никого не сме погрешиле. Без никакво размислувања, ќе продолжиме со работа затоа што овој период е привремен, иднината следува на вас кои за 23 години навистина бевте чувари на Рамковниот договор, постигнат со крв не само на борците туку и со крвта на претходните генерации кои се убиени од времето на Неџат Аголи и заврши до најмладите генерации и политичките затвореници кои страдаа низ затворите на Југославија за да може да постојат и да живеат со дигнитет. Ние сме господари на гордоста, на националната гордост и на државотворноста на нашата Република затоа што ние не гледаме друга идинна на некое друго место и затоа што не сме дојдени од некоја друга далечна земја. Но генерациски, од дедо прадедо, заедно со сонцето во овие простори и судбината на оваа земја ќе ја поделиме заедно со македонската заедница и заедно ќе бидеме посилни, порача Ахмети.

На Академијата организирана од Европскиот фронт другите говорници ја потенцираа потребата од децентрализација како аспект од Рамковниот договор на кој треба да се работи во наредниот период. Таков сигнал дојде и од Владата, како еден од нивните приоритетни проекти.

– Оваа нова Влада не е само на зборови туку и на дела, затоа јас сакам да се заблагодарам на нашиот премиер на оваа нова Влада што ќе даде милијарда евра за сите општини за децентрализација, каде што е дел и од Охридскиот рамковен договор и коишто ќе решава многу есенцијални проблеми во нашите населени мести и во нашите општини, во функција на подобар живот на сите граѓани во Република Северна Македонија, потенцираше вицепремиерот и министер за животна средина Изет Меџити на свечената седница во Владата.

И премиерот Мицкоски порача дека Охридскиот рамковен договор е дел од македонските закони и Устав и како влада ќе продолжат да ги решаваат  реалните проблеми на граѓаните.

–Јавноста не треба да паѓа во замката на нови и нови бесконечни етнички барања на партите кои сега се опозиција. Тие ја имаа својата шанса и времето го потрошија на лично богатење, и наместо да бидат посветени на борбата да победуваат за подобар живот на граѓаните, посилно образование, економија, повеќе пари за граѓаните, тие одлучија да градат за себе дворци, хациенди, да купуваат трговски центри, да злоупотребуваат сѐ што може да се злоупотреби, порача Мицкоски.

Ахмети: Ако нема соживот со Албанците, Македонците нема да постојат