Претседателот на СДСМ Венко Филипче може и ќе се види со премиерот Христијан Мицкоски ако претходно и официјално упати барање за лидерска средба. Ова е ставот на Владата за барањето на Филипче за лидерска средба на претседателите на најголемите партии за да разговараат за меѓуетничките односи по инцидентите со државното знаме.

И додека Мицкоски смета дека сега нема потреба од лидерска ни со опозициските партии ни со владините партнери, од ЗНАМ се децидни дека нивниот претседател Максим Димитриевски и премиерот веќе договориле состанок месецов, на кој првпат на маса ќе седнат Мицкоски и Димитриевски со лидерите на Вреди Изет Меџити, Арбен Таравари, Билал Касами и Зеќирие Ибрахими.

– Владата не ја гледа објективноста за барањето на ваква средба. Минатата влада немаше капацитет да води политички дијалози. Сега има Влада што и во рамките на извршната и на законодавната власт има капацитет за дијалози. Сосема е чудно зошто барањето за лидерска доаѓа преку медиумите. Се знае како се праќа официјално барање за лидерска, нека го пратат, па ќе размислиме и ќе одлучиме. Треба да биде јасно дека оваа Влада не работи за желбите на политичарите туку за интересите на граѓаните – изјави Марија Митева, портпаролка на Владата за барањето на Филипче за лидерска средба.

Од ВМРО-ДПМНЕ велат дека нема никаква причина за да се одржи лидерска средба за проблеми што СДСМ и ДУИ ги произведуваат. Според владејачката партија, СДСМ по тој принцип секој ден ќе бара лидерска.

– Ако СДСМ мисли дека лидерска средба ќе го направи Филипче лидер и дека нив ќе ги факторизира – се лаже. Нека си најдат друг начин да му билдаат легитимитет на Филипче. Народот неодамна им кажа што мисли за нив и за нивните политики и грабежот што го направија и уништувањето на институциите. Еве, ако сакаат од Филипче да направат лидер, за почеток нека се тргне од џебот и прегратките на Заев – велат од ВМРО-ДПМНЕ.

Од партијата додаваат дека лидерска средба не создава лидери и му порачуваат на СДСМ ако имаат тема за дискусија, да расправаат во парламентот и ако кажат нешто суштинско и паметно, ќе биде прифатено.

– Но, лидерска средба зашто едно утро им текнало дека им треба начин да се факторизираат заради провокации кои или тие или нивните ментори од ДУИ ќе ги направат во државата, е тоа не им прифаќаме. Нема ни логика и тоа не е продуктивно за државата. Лидерска средба не се договара преку медиуми, тие ако вистински сакаат, го знаат патот – велат од партијата на Мицкоски.

Филипче: Со остра реторика во Собранието може да се влоши состојбата

Филипче во интервју за „360 степени“ рече дека треба да се организира лидерска средба зашто меѓуетничките односи не се работа што треба да се адресира или да се менаџира со правни инструменти како интерпелација. Тој смета дека интерпелацијата на Тошковски, која ДУИ ја поднесе, нема да донесе ништо добро, туку со остра реторика во Собранието може да се влоши состојбата.

– Затоа повикуваме на политичка средба и ги повикувам лидерите на најголемите политички партии, и Христијан Мицкоски и Али Ахмети, но и лидерите на Вреди да седнеме и да разговараме поради тоа што од тука треба да излезе пораката и повикот за смирување на тензиите – рече Филипче.

Според него, тие што ги „палат искрите“ се политичарите и токму затоа од политичарите треба да произлезе повик за смирување на страстите и на тензиите, бидејќи стабилноста и мирот се најважни за земјава.

– Ако некој ја одбие таа средба, прво искрено ќе бидам многу разочаран. Ќе сметам дека некој има причина да се надева дека ова може да донесе некаков политички бенефит. Во оваа ситуација решение е само лидерска средба на која ќе седат лидерите на најголемите политички партии во оваа сериозно наелектризирана атмосфера, која веќе загрижува кон каде ќе оди и како ќе се развива – вели лидерот на СДСМ.

Од Европскиот фронт, кои во Собранието поднесоа интерпелација за Тошковски, но и за неговиот заменик Астри Исени, и за вицепремиерите Изет Меџити и Иван Стоилковиќ, велат дека во принцип не се против лидерска средба, но со прецизирање на учесниците.

Од Вреди не одговорија дали прифаќаат лидерска средба. Како што веќе објави „Слободен печат“, Вреди, исто како и ВМРО-ДПМНЕ, смета дека нема потреба од лидерска ни меѓу владините партнери.

ЗНАМ: Лидерската меѓу владините партнери ќе биде прва од таков вид

Наспроти позицијата на Мицкоски, од владејачката ЗНАМ тврдат дека Димитриевски веќе се видел со премиерот, но и дека месецов ќе има лидерска на владините партнери. Висок функционер од ЗНАМ за „Слободен печат“ вели дека уште вечерта по инцидентот со сквернавењето на државното знаме, висок функционер од ЗНАМ телефонски разговарал со Мицкоски и со Тошковски и побарал итна, одлучна и енергична акција од МВР против сторителите, што било спроведено и ЗНАМ за тоа се благодарни на МВР.

– Следниот ден, на барање на претседателот на ЗНАМ, имало средба меѓу Мицкоски и Димитриевски во Владата, и на таа средба е договорено дека месецов ќе има лидерска меѓу владините партнери. На средбата заклучиле дека инцидентите се смислено сценарио од луѓе што не ѝ мислат добро на државата и ако такви сценарија продолжат, државата енергично да одговори. Заклучено било и да се повика на смиреност – вели функционерот од ЗНАМ.

Според ЗНАМ, договорената лидерска ќе биде прва средба помеѓу Мицкоски, Димитриевски и лидерите од Вреди, иако Владата е речиси шест месеци на власт. Впечатливо е и дека нема потпишан коалициски договор за учество во Владата меѓу трите владини партнери. Ако има лидерска меѓу Мицкоски, Димитриевски и лидерите на Вреди, ќе биде прва средба по шест месеци, на која трите владини партнери ќе разговараат за економски и политички прашања, но и за последните инциденти.

Мицкоски не планира лидерска ниту со владините партнери иако Димитриевски ја најави