„Она што можам да го заклучам е дека мнозинството нема мнозинство за уставни измени и водејќи се од овој заклучок логичен след на настаните е Парламентот да се распушти, да формираме техничка влада и да одиме на предвремени парламентрани избори“, рече претседателот на опозициската ВМРО-ДПМНЕ денеска по лидерската средба во Собранието.

Тој ја критикуваше власта за она што се разговарало на лидерската средба. Рече дека наместо за реалните проблеми со кои во моментов се соочуваат граѓаните, тие разговарале за отворање на Уставот и бараните уставни измени.

„Тоа се оние, реални, за коишто треба да се разговара на едни вакви средби на коишто се политичари кои носат одговорност и треба да им помогнат на граѓаните и да разговараат за тие теми. За жал, денеска мнозинството ја пропушти оваа можност и бидејќи ја пропушти, единствената тема којашто беше во нивен фокус е тоа што нив ги интересира за дефокус на ова се каде што се тие неуспешни, а тоа е таканаречените уставни измени под превезот на некаква си европска иднина која што многупати во минатото самите тие ја погазија. Од она што можам да го заклучам, а тука се и останатите претседатели на политички партии кои што се дел од коалицијата парламентарна, тука се Иван Стоилковиќ и Љупчо Димовски дека мнозинството нема мнозинство за уставни измени. Нема мнозинство за уставни измени и водејќи се од овој заклучок, логичен след на настаните е парламентот да се распушти, да формираме техничка влада и да одиме на предвремени парламентарни избори“, рече Мицкоски.