Премиерот Христијан Мицкоски не планира лидерска средба ниту со владините партнери ЗНАМ и Вреди ниту со лидерите на парламентарните партии, вели за „Слободен печат“ висок функционер од Владата. Лидерска веќе побара опозицискиот СДСМ, а претседателот на владејачката ЗНАМ Максим Димитриевски на ТВ Сител најави дека месецов Мицкоски ќе свика лидерска со владините партнери. Според ова, неуспешен е обидот на Димитриевски да му ја планира агендата на премиерот, затоа што Мицкоски не знае дека во текот на месецов треба да ги свика на состанок Димитриевски, Изет Меџити, Арбен Таравари, Билал Касами и Зеќирие Ибрахими.

– Имаме редовна комуникација во рамките на коалицијата. Во овој момент нема потреба од лидерска средба – вели владиниот функционер.

Впечатливо е дека Димитриевски изјави дека досега не разговарале со владиниот партнер Вреди и дека на лидерската очекува да се отворат сите теми, вклучително и тие за последните инциденти со државните симболи.

– ЗНАМ како владин партнер и за партиципирање во власта има разговарано со претставници на ВМРО-ДПМНЕ. Ги имаме усогласени политиките. Досега немаме разговарано со Вреди и се надевам дека во следниот период отворено ќе седнеме и ќе разговараме како партнери за сите отворени прашања, вклучително и за истакнување на државните знамиња и симболи – рече Димитриевски.

Наспроти тврдењето на претседателот на ЗНАМ, и од Вреди за „Слободен печат“ негираат дека нема комуникација меѓу владините партнери.

– Секојдневно комуницираме со Горан Минчев, со Игор Филков и со Димитриевски, особено е секојдневна комуникацијата меѓу министрите. Нема најава за лидерска меѓу владините партнери – вели за „Слободен печат“ висок владин функционер од Вреди.

Мицкоски претходно го одби повикот на СДСМ за лидерска средба на сите парламентарни партии за последните инциденти со сквернавење на државното знаме. Според СДСМ, лидерската е можност да се обединат сите политички субјекти околу пораката дека „Македонија останува стабилна и посветена на мирот, соживотот и почитувањето на различностите“, но премиерот изјави дека во моментов не гледа причина за тоа.

– Не сум размислувал, но деновиве што се пред мене ќе размислувам на таа тема. Доколку навистина има аргументи што одат во таа насока, зошто да не. Но во моментов не гледам причина за такво нешто ако гледам објективно – рече Мицкоски.

Димитриевски, пак, барањето на СДСМ го оцени како „класично политичко лицемерие и ловење на евтини политички поени“.

– Тие до вчера беа на власт, видовме како практикуваа власт. Имаше вакви или слични појави и во минатото и секогаш отстапуваа. Не преземаа ништо, но оваа власт нема намера така да функционира – рече Димитриевски.

Според информации на „Слободен печат“, не се исклучува средба меѓу Мицкоски и лидерот на СДСМ Венко Филипче ако опозицискиот лидер побара средба со премиерот. Мицкоски неодамна кажа дека иако власта веќе пет месеци ја практикуваат, досега Филипче не побарал средба со него, додека тој кога бил опозициски лидер, веднаш барал средба со премиерот.