Премиерот Христијан Мицкоски денеска приуствува на шестиот Собир на Европската политичка заедница под наслов „Нова Европа во новиот свет: единство – соработка – заедничко дејствување“ во Тирана.

Клучна тема на настанот, на кој домаќини се претседателот на Европскиот совет Антонио Кошта и албанскиот премиер Еди Рама, ќе биде сигурноста и споделената визија за иднината на Европа.

Се очекува присутните да дискутираат за безбедноста на Европа, вклучувајќи ја и поддршката за Украина, европската одбрана, заштитата на демократијата, како и подготвеноста и капацитетот за одговор на разни закани.

На собирот на ЕПЗ во Тирана е најавено присуство на 47 шефови на држави или влади од Европа.

Покрај премиерите Мицкоски и Рама, на настанот ќе учествуваат и претставници на сите 27 членки на ЕУ, на земјите од ЕФТА (Исланд, Лихтенштајн, Норвешка и Швајцарија), како и на Азербејџан, Андора, Босна и Херцеговина, Велика Британија, Грузија, Ерменија, Косово, Молдавија, Монако, Сан Марино, Србија, Турција, Украина и Црна Гора.

На настанот ќе бидат присутни и претседателката на Европската комисија, Урсула фон дер Лајен, високиот претставник на ЕУ за надворешни работи и безбедносна политика, Каја Калас, како и генералните секретари на НАТО, Марк Руте, на Советот на Европа, Ален Барсе и на Организацијата за безбедност и соработка во Европа (ОБСЕ), Феридун Синирлиоглу.

Кошта синоќа во Тирана организираше вечера за водачите на шесте земји од Западен Балкан, на која присуствуваа и Фон дер Лајен и Калас.

Идејата на Европската политичка заедница е да го поттикне дијалогот и соработката помеѓу водачите на континентот за справување со прашања од заеднички интерес и за зајакнување на безбедноста, стабилноста и просперитетот на Европа.

Претседателот на Европскиот совет вчера беше во посета на Македонија, каде му порача на премиерот Мицкоски дека за евроинтегративниот процес на Македонија нема план Б, туку дека треба да се исполни она што е договорено.

Кошта: Нема план Б, треба да се исполни тоа што е договорено