Македонија е меѓу оние земји членки на НАТО кои веќе ги надминуваат стандардите за буџетски издвојувања за одбраната, со повеќе од 2,5 проценти од Бруто домашниот производ, рече премиерот Христијан Мицкоски.

„Македонија одамна има буџет за одбраната кој е над 2 проценти. Со проектите за модернизација на Армијата и инфраструктурните проекти, овие трошоци ќе растат“, изјави Мицкоски на денешната заедничка прес-конференција со претседателот на Советот на ЕУ, Антонио Кошта.

Тој додаде дека новите насоки од најголемата земја членка на НАТО не се за зголемување на лимитот на 5 проценти, туку за поставување на 2 проценти како минимум.

„Ние сме одамна над тие 2 проценти. За жал, голем дел од земјите членки на НАТО се сè уште под тие два проценти“ додаде Мицкоски.

Претседателот на Европскиот совет, Антонио Кошта, денеска е во еднодневна посета на Скопје, каде покрај со премиерот Христијан Мицкоски ќе се сретне и со претседателката Гордана Сиљановска-Давкова.

Кошта веќе ги посети Белград и Сараево.