Премиерот Христијан Мицкоски денеска изјави дека Владата го раскинала договорот меѓу компанијата „Хеј“ и Државната лотарија бидејќи киријата што Лотарија ѝ ја плаќала на компанијата Хеј според договорот, била трипати повисока од пазарната. Мицкоски додаде дека раскинатиот договор е основа за кривична одговорност и дека постојат „сериозни сомнежи за криминал од страна на претходната власт“.

Државната лотарија за 13 месеци исплатила над 300.000 евра на фирмата „Хеј“ за наем на поранешниот ресторан за свадби „Фестина“ во Визбегово, односно Државната лотарија од јули лани секој месец плаќала по околу 25.000 евра на приватната фирма.

Фирмата „Хеј“ ѝ е позната на јавноста, бидејќи се поврзуваше со луѓе блиски до поранешниот вицепремиер Артан Груби, како и луѓе блиски до поранешниот заменик Исмаил Јахоски.