Лидерот на ВМРО-ДПМНЕ Христијан Мицкоски по состанокот на Централниот комитет го симна од дневен ред експретседателот на партијата Никола Груевски, по нивните меѓусебни обвинувања на јавна сцена дека соработувале со власта. Мицкоски објави фотографија на Фејсбук со министерката за внатрешни Гордана Јанкуловска, некогаш најблиска соработничка на Груевски, со порака: „Средба силна колку Горде. Неправдата никогаш не нè скршила“. Од партијата не коментираат дали тоа значи дека и најблиските соработници на експремиерот сега се со Мицкоски.

Конфликтот меѓу актуелниот лидер на ВМРО-ДПМНЕ и неговиот претходник со сета жестина изби на површина откако Мицкоски го обвини Груевски дека е дел од оската ДУИ и СДСМ за поделба на ВМРО-ДПМНЕ и за да се обезбеди двотретинско мнозинство за уставните измени. Груевски го негира тоа и возврати дека е цел на жестоки напади „во време кога Мицкоски и Заев не ги негирале објавите за нивна блиска соработка и заеднички планови“.

Груевски побара да се вклучи преку видеоврска на состанокот на Централниот комитет на партијата, но никој од стотината присутни не се „сети“ на тоа, туку со аплаузи и акламативно го подржаа Мицкоски.

„Кога некој се обвинува, има право и да се чуе неговото мислење. Доколку на седницата на ЦК вечерва се зборува за мене и ако сакате тоа демократско правило да го испочитувате, ви стојам на располагање преку видеоврска да се вклучам во живо. Имам многу што да ви кажам, и за ова што сум нападнат, а ако сакате и за повеќе други работи за кои сè уште се воздржувам јавно, иако сум најбрутално нападнат од актуелниот претседател на партијата. И во една ваква ситуација се контролирам, за да не направам штета на партијата“, предложи Груевски.

Мицкоски зборувал за заедничко сценарио на власта и на Груевски, по што уште еднаш побарал поддршка од пратеничката група за уставните измени, на што координаторот Никола Мицевски во име на сите пратеници повторил дека стојат и зад лидерот и зад ставот дека уставни измени под бугарски диктат нема да има. На состанокот било речено дека последните случувања може да предизвикаат мали турбуленции во партијата, но дека на крајот партијата ќе излезе со поголем коалициски капацитет и ќе биде поатрактивна за неопределените гласачи, што било поздравено со аплауз.

„ВМРО-ДПМНЕ го осуети планот на власта, на оската ДУИ-СДС и поранешни функционери на опозицијата, кои одлучиле да се стават на нивно располагање, преку валкани дилови за причини само ним познати, а кои директно ќе одат на штета на македонскиот народ. Дополнително, се потврди силната кохезија што ја има пратеничката група на ВМРО-ДПМНЕ и Коалицијата, од почеток до крај сите 44 пратеници, во однос на неприфаќање уставни измени под бугарски диктат. Воедно, падна во вода и тезата што власта ја пласираше години наназад во јавноста дека партијата ја раководат други лица, затоа што различностите се очигледни денес“, соопшти партијата.

Од ВМРО-ДПМНЕ додаваат дека ќе бидат главни во „идната влада што ќе ги донесе промените неопходни на Македонија, а потоа ќе следува одговорност за сите што во различни сфери и области ѝ направиле голема штета на Македонија“.

Груевски се правда дека не влијаел врз пратениците и дека една година нема разговарано со нив:

„Ниту пак сум планирал такво нешто. Ниту пак мислам дека треба да го менуваат ставот на партијата по однос на точката околу промената на Уставот. И онака имаше премногу неконзистентност за многу работи досега“.

Ова е првпат претходниот партиски лидер да се изјасни за уставните измени, односно дека е на иста позиција како и актуелните пратеници. Од партијата ова го толкуваат како изнудена изјава откако го осуетиле планот за поделба на партијата во кој бил вклучен и Груевски.

Порака на Груевски му испрати и првиот претседател на ВМРО-ДПМНЕ, сега лидер на ВМРО-Народна, Љубчо Георгиевски.

„Сè што ми напрaви мене, сега ти го прават тебе. По учебникот што им го остави. Само, очигледно, тие што ми беа лојални беа далеку помногубројни. Порака до ВМРО-Шумадија: Многу мал чекор треба да направите за да му помогнете на вашиот довчерашен лидер, кој единаесет години ви даваше власт. Да им помогнете на уште петнаесетина ваши сопартијци што лежат по затворите вклучувајќи ги и тие од 27 април. Да ѝ помогнете на Македонија на патот до Европа“, напиша Георгиевски на Фејсбук.

Откако на поранешниот градоначалник на Општина Центар, Владимир Тодоровиќ, осомничен и обвинет за злоупотреба на службената положба и овластување за проектот „Скопје 2014“, му се укина мерката куќен притвор, партијата Алтернатива прашува:

„Кој е следен да ги ужива плодовите од измените во Кривичниот законик? Мијалков или Јанкуловска? После ова и Груевски почнал да го пакува куферот за Скопје?“, се вели во партиското соопштение.