„Мицко нè турна кон Путин“, искоментира на социјалните мрежи професорката Мирјана Најчевска, откако денеска Македонија стана коспонзор на американската резолуција во Обединетите нации за Украина, во која Русија не беше означена како агресор кој со инвазијата врз Украина ја прекршил Повелбата на Обединетите нации.

„Овој потег ја става Македонија на мапата на конзервативни држави-поддржувачи на Путин и е многу поштетен од сите глупости на Левица и нејзините лигавења со руската дипломатија. Со ова Мицкоски ја препознава окупацијата на Македонија од страна на Бугарија како административно присуство, а не окупација“, напиша Најчевска во објавата.

Со 93 гласови „за“ и само 18 „против“ и 65 воздржани, земјите-членки на ОН денеска ја поддржаа резолуцијата предложена од Украина зад која застана целата ЕУ, а која руската инвазија во Украина го нарекува „воена агресија“ и дава поддршка на територијалниот интегритет на земјата, барајќи повлекување на руските војници. Македонија беше воздржана на ова гласање.

Резолуцијата предложена од САД користеше многу поблаг речник, без директна осуда на Русија, која не се именуваше како агресор или извор на конфликтот. Оваа резолуција не доби поддршка во оригиналната форма, а Собранието во неа додаде реченици со кои јасно се кажува дека Русија е агресор кој со инвазијата врз соседната земја ја прекршил Повелбата на ООН.

Вака изменета, американската резолуција потоа помина на Генералното собрание на ОН – зад неа застанаа 93 земји, 8 беа против, а 73 воздржани.

Македонија е коспонзор на американската резолуција во ОН за Украина