Потпишан договор меѓу Дирекција за технолошки индустриски развојни зони и Меѓународната финансиска корпорација, најголемата светска развојна институција што се фокусира на приватниот сектор на пазарите во развој. Со овој договор се предвидува помош за спроведување кампања за привлекување инвестиции во напредните производствени сектори на државава.

– Кампањата има цел да поддржи создавање одржливи работни места, да ѝ помогне на земјата подобро да се интегрира во глобалните синџири на вредности и да се поттикне економскиот раст, се вели во соопштението на МФК.

Кампањата ќе трае до крајот на 2020 година, а е дел од програма што ја спроведува МФК во партнерство со Европската Унија за охрабрување на инвестициите и за прекугранична трговија во Западен Балкан и во Југоисточна Европа.

Директорот на ДТИРЗ, Александар Младеновски, рече дека сега треба да ги преиспитаме дејностите и инвестициите што можеме да ги привлечеме за да добиеме идеална комбинација на содржината на труд и капитал.