Здравјето влегува низ устата, така нè учеа постарите. Оваа поговорка веќе не важи, бидејќи сè помалку јадеме здрава, домашна, природно одгледана храна. Денес граѓаните се сомневаат во сè што ставаат во чиниите, бидејќи најголемиот дел од храната е од увоз и е со прилично сомнителен квалитет. Зголемена содржина на афлатоксин, можна контаминација со тврди честички, зачестени труења со салмонела, зеленчук во кои се забележуваат траги од забранети пестициди… Агенцијата за храна и ветеринарство го става клучниот акцент на инспекциите на продавниците, месарниците, рестораните и фармите.

Оттаму за „Слободен печат“ велат дека месото, млекото, рибата и јајцата спаѓаат во групата на високоризична храна, додека билките, житарките, овошјето и зеленчукот, мастите, јаткастите плодови, брашното, квасецот, кафето и какаото се оценети со оценка за среден ризик. Како најмалку ризични се медот, водата, солта, шеќерот, печурките, оцетот и материјалите што доаѓаат во контакт со храната.

– По три годишни контроли прават инспекторите од Агенцијата за храна и ветеринарство на објектите со висок ризик, оние со среден ризик се посетуваат двапати, а само една годишна контрола се спроведува во објектите што се оценети дека се со мал ризик. Инаку, идентификувањето и утврдувањето на ризикот се заснова на претставки од граѓани, јавни коментари, РАСФФ нотификациите, како и од одделението за проценка на ризик, анализите и резултатите од различни мониторинг програми. Во втората половина од 2024 година, ги интензивиравме вонредните инспекциски контроли, со акцент кај операторите со храна, кои работат со ранливите категории граѓани: игротеки, домови за стари лица, кујни во градинки и основни и специјални училишта, пазари за стари работи, но и во угостителски објекти – велат од АХВ.

Според процената на ризикот, инспекторите најчесто ги посетуваат кланиците, објектите за расекување на месо, месарниците со работилници, како и кујните на рестораните, гостилниците и слаткарниците. Високоризични се и објектите за подготовка на месо, собирните центри за млеко, објектите за производство на слаткарски производи, како и објектите за преработка на јајца, риба и рибарниците. Средноризични се оние што препакуваат, пастеризираат и лупат, а најмал ризик има кај објектите за пакување вода и јавно водоснабдителните објекти.

Во АХВ има 110 официјални ветеринари и 73 инспектори за храна. Во текот на второто полугодие од 2024 година биле спроведени вкупно 24.335 надзори, односно 132 надзори по инспектор. Најмногу надзори имало во Пелагонискиот и во Скопскиот регион, на кои отпаѓаат дури една третина од вкупните посети на инспекторите на АХВ – објаснуваат од АХВ во нивниот лански полугодишен извештај.

Освен редовни, инспекторите на АХВ вршат голем број вонредни инспекциски надзори, а лани биле реализирани повеќе поради појавата на заразна болест африканска чума кај свињите, како и поради појавата на птичјиот грип. Имало и повеќе вонредни надзори поради поголемиот број претставки по основа на несовесно чување и одгледување кучиња, неправилности во областа на безбедноста на храната и поголем број контроли при увоз и извоз на храна од животинско и од неживотинско потекло, кои не можат да се предвидат.