Германскиот производител на автомобили Мерцедес-Бенц планира да го пресели дел од своето производство на возила од Берлин во Полска како одговор на растечката конкуренција од Кина и високите оперативни трошоци во Германија. Мерцедес постепено ќе ја затвори својата фабрика во Лудвигсфелде во близина на Берлин до крајот на 2029 година, каде што моментално вработува повеќе од 2.200 луѓе. Фабриката, столб на индустријата во Бранденбург повеќе од 30 години, произведува околу 60.000 специјализирани варијанти на комбето Спринтер и електрични возила годишно, објави полскиот канал ТВП Ворлд- пренесе Политика.

Производството на е-Спринтер, електрична верзија на популарното комбе за достава, ќе биде преместено во Полска, предизвикувајќи контроверзии меѓу германските синдикалисти и локалните власти. Тобијас Кунцман од синдикатот IG Metall, најголемиот во земјата, најави дека ќе има протести во Лудвигсфелде, велејќи дека одлуката е неприфатлива.

Според германските медиуми, трошоците за работна сила во Германија моментално се пет пати повисоки отколку во Полска, втор најголем производител на батерии за електрични возила во светот, по Кина. Германскиот автомобилски гигант ќе изгради нова фабрика во Јавор во југозападна Полска, каде што Mercedes-Benz произведува мотори и батерии за хибридни автомобили од 2019 година.

Mercedes има за цел да создаде најмалку 300 нови работни места до 2027 година, вклучувајќи 30 за лица со високо образование, како дел од проектирана инвестиција од 1,528 милијарди злоти (360 милиони евра), објави полскиот весник Zsółpospolita.