Минатата година, Меланија Трамп ги објави своите мемоари, што предизвика низа реакции, а сега започнаа шпекулации дека нејзините мемоари се напишани од Четџипити (ChatGPT).

Имено, освен самата содржина, посебно внимание привлече и одлуката на Меланија самата да не ја чита својата аудио книга, туку вештачката интелигенција да ја нарира, користејќи го нејзиниот дигитален глас.

„Нека започне иднината на издаваштвото. Горда сум што ви ја претставувам Меланија – Аудиокнигата со вештачка интелигенција, раскажана целосно со мој глас, создаден од вештачка интелигенција“, рече таа претходно.

На форуми како Редит (Reddit), се шпекулираше дека не само што нејзиниот глас бил вештачки, туку и целиот текст. Иако не е потврдено дека книгата е напишана со помош на вештачка интелигенција, корисниците на Редит ги изразија своите сомневања.

„Звучи како нејзиниот писател-дух да го ангажирал Четџипити како свој асистент“, „Има типичен тон, како да е напишано од робот кој користи премногу големи зборови без вистински емоции“, „Сепак се продава поради името, а не поради содржината“, беа само некои од коментарите.

Во октомври минатата година, американскиот комичар Џордан Клепер се потсмеваше на мемоарите на Меланија читајќи пасус во кој наводно е опишан интимен момент по победата на Трамп во 2016 година.

„Треба да си ја избришам солзата. Навистина трогателен момент кој не е напишан од Четџипити“, рече комичарот во тоа време, осврнувајќи се на фактот дека во нејзиниот пасус недостасувала каква било емоција.