Во знак на признание за нејзиниот исклучителен придонес во филмската уметност, холивудската актерка Мег Рајан ќе ја добие наградата „Почесно срце на Сараево“ на 30-тиот Сараевски филмски фестивал.

Холивудската ѕвезда позната по својата сестраност и природен шарм во секоја улога што ја игра, Мег Рајан ќе претстави и специјална проекција на својата романтична комедија хит од 1998 година „Имате порака“ (You’ve Got Mail) во летното кино „Кока-Кола“. Познатата актерка ќе ја поздрави публиката на истото место каде што овој филм беше прикажан пред 25 години, на петтиот Сараевски филмски фестивал, во 1999 година.

Рајан исто така ќе одржи и мастерклас под модерација на наградуваниот босанско-херцеговачки режисер Данис Тановиќ, добитник на Оскар за филмот „Ничија земја“. Мастеркласот ќе биде посебна можност да се добие увид во клучните аспекти на кариерата на Мег Рајан и нејзиниот нов филм „Што се случува подоцна“, кој исто така ќе биде прикажан на Фестивалот. Романтичната комедија на Бликер стрит медиа „Што се случува подоцна“ (What Happens Later), која Рајан го режираше, го напиша сценариото и во која глуми со Дејвид Духовни, е нејзино второ режисерско дело, по независниот филм „Итака“ (Ithaca) од 2015 година.

– Мег Рајан ги освои нашите срца на прв поглед! Не само што нè шармираше сите со своите незаборавни изведби, туку и зад камерите ја докажа својата моќ како режисерка и сценаристка. Чест ни е да ѝ го доделиме „Срцето на Сараево“ – рекол Јован Марјановиќ, директор на Сараевскиот филмски фестивал.

ФОТО | „Почесното срце на Сараево“ за Мадс Микелсен: Првпат сум овде, но јадев ќебапи