„Најголемата џамија во Македонија, споменик на модерна и духовна архитектура, се гради во Топанско Поле, која ќе стане центар на верата за илјадници верници“, објави денеска на социјалните мрежи првиот вицепремиер, министерот за животна средина и просторно планирање и кандидатот за градоначалник на скопската општина Чаир, Изет Меџити.

Тој на „Фејсбук“ објави измонтирано пропагандно видео од посетата на градилиштето на џамијата, која треба да се отвори во февруари идната година, пред почетокот на светиот муслимански месец Рамазан.

„Џамијата ќе има капацитет за над 3.000 верници, со простор од 1.500 м2 внатре и 1.500 м2 надвор. Покрај тоа, објектот ќе вклучува и амфитеатар, 24 функционални канцеларии и подземен паркинг, нудејќи модерни и функционални услови за верниците и посетителите“, напиша Меџити во објавата на „Фејсбук“, без да појасни во која од повеќето функции ја посетил џамијата и зошто ја претставува нејзината изградба како своја заслуга.

Меџити, кој држи две високи државни функции, а се кандидира за локална во Чаир, уште од август, еден и пол месец пред официјалниот почеток на кампањата за претстојните избори, одеше на промотивни предизборни настани и активности во Чаир, во работното време како вицепремиер и министер.

Изет Меџити – прв вицепремиер, министер за животна средина и кандидат за градоначалник на Чаир во едно