Потпретседателот на Советот за безбедност на Русија, Дмитриј Медведев, изјави дека искуствата од Потсдамската конференција од 1945 година сè уште можат да се применат на сегашната ситуација во Украина, оценувајќи дека, покрај демилитаризацијата, денацификацијата и демократизацијата, на таа земја ѝ е потребна и „депаразитизација“.

Во интервју за рускиот ТАСС по повод 80-годишнината од почетокот на Потсдамската конференција, Медведев оцени дека поранешните сојузници на Советскиот Сојуз ги прекршиле одлуките донесени кратко по војната и продолжиле со долгогодишна политика на непријателство кон Русија.

Коментирајќи ги критериумите „три Д“ (демилитаризација, денацификација и демократизација) што беа применети кон Германија по војната, Медведев оцени дека овие принципи се релевантни и за денешна Украина.

„Денес, елементи на отворен нацизам се присутни во Украина – симболи, идеолози, реторика на омраза. Милитантните формации презедоа политичка улога и честопати не се под целосна контрола на државата. Покрај тоа, владата во Киев станува трајна, опозицијата е прогонувана, а слободата на медиумите е речиси непостоечка“, рече Медведев.

Тој го обвини Западот дека не ја извршил вистинската денацификација на Германија дури ни по Втората светска војна, наведувајќи дека многу нацистички злосторници останале неказнети или брзо биле амнестирани.

„Западните елити направиле сè за да ја зачуваат нацистичката идеологија. Денес во Германија сè уште има луѓе на власт кои се горди на своите нацистички предци, а реториката на функционери како министерот за одбрана Писториус и канцеларот Мерц потсетува на минатото“, рече Медведев.

Тој додаде дека Русија нема намера да војува со НАТО или да ја нападне Европа, оценувајќи дека спротивните тврдења се бесмисленост што намерно се изнесуваат за да се дестабилизира ситуацијата. „Тие факти мора да бидат познати на јавноста. Бидејќи главниот судија за нацистите не била историјата, туку војник на Црвената армија“, заклучи Медведев.