Медитеранска диета претставува режим кој е базиран на внес на локална, свежа и сезонска храна, лесен протеин и здрави масти. Доколку вежбате и немате многу време да подготвите оброк, оваа диета ќе се поклопи со вашиот живот бидејќи оброците се вкусни, релативно брзи и балансирани во хранливи вредности.

Основа на медитеранската диета

Основните состојки на диетата се: овошје, зеленчук и мешунки. Сите видови суви и свежи мешунки (грав, леќа, наут) кои се дел од диетата како извор на растителен протеин, зелен лиснат зеленчук, цитрусно овошје, маслиново масло и една чаша црвено вино дневно се главните столбови на традиционалната медитеранска софра.

Правила за медитеранска диета

Користете маслиново масло како главен извор на здрави масти и заменете ги сите други масти и масла за пржење и салати.

Јадете многу свежо овошје како десерт во текот на денот. Ограничете го конзумирањето на благо што содржи големи количини шеќер и заситени масти и наместо тоа насочете се кон овошје.

Внесувајте леб од цело зрно и интегрални житарици.

Вклучете во режимот и сирови јаткасти плодови во разумна количина и семиња.

Јадете мали количини сирење и јогурт.

Јадете мали до умерени количини на риба и живина во тек на неделата и ограничете го внесувањето на јајца на максимум 4 неделно.

Одвреме-навреме јадете црвено месо, можеби еднаш неделно.

Која е тајната на медитеранската диета?

Главната карактеристика на медитеранската диета е едноставноста. Друга карактеристика е свежината и квалитетот на употребената храна. Обидувајте се секогаш да користите сезонска храна што расте во климата каде живеете. Производите што се транспортираат од едниот до другиот крај на светот во фрижидери, секогаш губат хранливи материи и вкус.

Сè на сè, медитеранската диета може да ви помогне да останете здрави, витки и убави на долг рок, бидејќи станува збор за балансиран внес на сите групи на храна, пренесува „Healthline“. 

Пред да се одлучите за било каква диета, задолжително консултирајте се со вашиот лекар!