Килијан Мбапе ќе биде нов капитен на репрезентацијата на Франција.

Ваква одлука донесе селекторот Дидие Дешам пред почетокот на новиот циклус квалификации за Европското првенство кое ќе се игра следната година во Германија.

Уго Лорис беше капитен на Франција, но откако по Мундијалот се прости од националниот тим селекцијата остана без капитен. Капитенската лента Лорис ја носеше цели 14 години, од 2008 до 2022 година.

Дешам го избра Мбапе пред Антоан Гризман поради што се води полемика во јавноста во оваа земја. Мбапе е најважниот играч на Франција, но има само 24 години, а беше поврзуван и со неколку скандали. Француските медиуми шпекулираат дека незадоволен бил и самиот Гризман кој поради ваквата наводно би можел дури и да ја напушти репрезентацијата.

Мбапе со репрезентацијата беше светски шампион во 2018 година на Мундијалот во Русија и одигра 66 натпревари, постигнувајќи 36 гола.