Мбапе, Халанд и Влаховиќ меѓу најголемите желби во зимскиот преоден рок 2022
Зимскиот преоден рок ќе биде активен веќе во следниот месец, а во јануари ќе се продолжи со информациите околу иднината на едни од моментно најдобрите фудбалери на светот за кои се зборуваше и годинава. Први ѕвезди во зимскиот преоден рок 2022 се очекува да бидат Килијан Мбапе, Ерлинг Халанд, Роберт Левандовски, Пол Погба, Душан Влаховиќ…
Препорачано
Напаѓачот на Баерн Минхен, Левандовски не ја доби „Златната топка“, иако многумина сметаа дека ја заслужува. Веднаш потоа шпанскиот „Ас“ ја пренесе информацијата дека Полјакот би сакал да си замине од Минхен, а првата опција би била понудата на Реал Мадрид.
„Кралскиот клуб“ долго време веќе ја следи ситуацијата и со Мбапе, кој според многумина би сакал да дојде во Мадрид, бидејќи не е првата ѕвезда во Париз, покрај Меси и Нејмар.
Мадрид е подготвен да понуди над 200 милиони евра за да го ангажира Французинот, што не изгледа невозможно, а доколку не се реализира трансферот оваа зима, тогаш најверојатно следното лето кога истекува договорот со ПСЖ.
Борусија Дортмунд го дава сиот максиум за да го задржи Халанд што подолго. Неговата цена е 150 милиони евра, а „милионерите“ сигурно нема да се согласат на помалку. Има многу кандидати, почнувајќи од Манчестер јунајтед, Реал Мадрид, Ливерпул…
Кога се во прашање играчите кога клубовите се „караат“, неблагодарно е да не се спомене Душан Влаховиќ. Србинот е на „мета“ на Јувентус, Арсенал, но и други европски гиганти, кои едвај чекаат разврска на ситуацијата околу неговиот договор во Фиорентина.
Договорот на Пол Погба со Јунајтед истекува во летото 2022 година, а двете страни и натаму немаат постигнато нов договор. Доколку тоа не се случи, последна шанса за „црвените ѓаволи“ да заработат нешто од Французинот ќе биде зимава. Враќањето во Јувентус не е отпишано, а останатите кандидати трпеливо ја чекаат шансата.
Во летото оваа година клубовите ги сменија Кристијано Роналдо и Лионел Меси, што доста го потресе фудбалскиот свет. Малкумина очекуваат слични „бомби“ да се случат и во зима, но има една важна работа што се случи пред само два месеци.
Њукасл доби нови сопственици, саудискиот принц Мохамед бин Салман, па се очекува буџетот на клубот за зимата да биде меѓу 200 и 300 милиони евра. Знаејќи дека Њукасл е последен во Премиер лигата без победа од стартот на сезоната, треба да очекуваме дека нивниот преоден рок ќе биде најтурбулентен.
ВИДЕО: „Ѓаволско“ полувреме на Јунајтед за победнички крај на 2021 година
