Тангараџу Супиах (46) од Сингапур ќе биде погубен со бесење поради трговија со марихуана, јавува „Би-Би-Си“. Активистите во Сингапур велат дека Тангараџу бил осуден со „слаби докази“.

Надлежните велат дека егзекуцијата на 46-годишниот маж е закажана за утре. Обвинетиот е лице со интелектуална попреченост. Сингапур ги има можеби и најстрогите закони против користењето и трговијата со дрога во светот, за кои тврди дека се неопходни за заштита на општеството.

Во последните денови, членовите на семејството на обвинетиот и активистите испратија писма до претседателката на Сингапур, Халимах Јакоб, барајќи од неа да го помилува Тангараџу. Британскиот милијардер Сер Ричард Бренсон го повика Сингапур да ги запре егзекуциите и да го разгледа случајот.

„Знам дека брат ми не направи ништо лошо. Го повикувам судот да го разгледа неговиот случај од почеток“, им рече на новинарите Леела Супиах, сестрата на Тангараџу.

На Тангараџу му се суди за „учество во заговор“ за испорака на еден килограм канабис од Малезија во Сингапур во 2013 година. Иако не бил фатен како ја врши испораката, обвинителите рекоа дека тој е одговорен за нејзино координирање. Тие рекоа дека следеле два телефонски броја што ги користел.

Тангараџу тврди дека тој не е лицето кое комуницирало со другите поврзани со случајот. Тој рече дека изгубил еден од телефоните, а негираше дека го поседува другиот.

Сингапурскиот закон наметнува смртна казна за шверц на дрога и има полесни казни за „доставувачите“. Во последната жалба на Тангараџу, судијата се согласи со обвинителството дека Тангараџу е одговорен за координирање на испораката, поради што не може да добие полесна казна.

Активистите, исто така, изразија загриженост дека Тангараџу не добил соодветен пристап до преведувач и морал сам да ја аргументира својата последна жалба бидејќи неговото семејство не можело да обезбеди адвокат. Сингапурските власти велат дека Тангараџу побарал преведувач само за време на судењето, а не порано. Тие додадоа дека тој имал пристап до правен совет во текот на целиот процес.

Строгите правила на Сингапур се во спротивност со неодамнешните потези на неговите соседи. Тајланд ја легализираше трговијата со канабис, додека Малезија ја укина смртната казна за тешки кривични дела.