Маж од јужната индиска држава Керала останал заробен во болнички лифт 42 часа без храна и вода. Педесет и деветгодишниот Равиндран Наир влегол во лифтот за да оди на лекар. Влегол во лифтот во саботата попладне и останал заглавен до понеделник наутро, пишува Би-би-си.

На крајот успеале да го извлечат од лифтот и тој моментално се лекува од дехидрација. Наир изјавил дека кога бил заробен, се обидел да се јави на бројот за итни случаи наведен во лифтот, но немало одговор.

Тој се обидел да ѝ се јави и на својата сопруга, која работи во болницата, и „на кој друг што ќе ми текне“, но не добил одговор.

„Почнав да паничам и да трескам на вратата од лифтот за да привлечам внимание. Тогаш мојот телефон падна на подот и престана да работи“, рекол тој.

„Како што минуваа часовите, не знаев дали е ден или ноќ, бидејќи внатре беше црно. Кога се уморив, спиев во аголот. Морав да го користам другиот агол за тоалет“, додал Наир.

Наир рече дека кога оди во болница, нормално го користи лифтот за вработените, со оглед на тоа што неговата сопруга е вработена во болницата, но овој пат го користел лифтот наменет за пациенти и посетители.

„Само што беше поминато пладне. Немаше никој во лифтот, но светлото беше запалено, па не мислев дека нешто не е во ред“, објаснил тој.

Го притиснал копчето и лифтот почнал да се крева, но кога се приближувал до вториот кат, лифтот почнал да пропаѓа надолу и се заглавил помеѓу првиот и вториот кат.

„По некое време почнав да се прашувам дали ќе умрам во лифтот. Се грижев за мојата сопруга и за децата и размислував за моите покојни родители и предци. Но, тогаш некако сакав да бидам посилен и си реков дека морам да го надминам ова застрашувачко искуство“, раскажал Наир.

Една работа што го тешела, вели тој, е рецитирањето песни напишани од неговата сопруга.

„Се надевав дека некој ќе дојде да го поправи лифтот и да ме најде таму“, додаде тој.

Помошта конечно пристигнала во понеделникот наутро околу 6 часот по локално време кога оператор ја отворил вратата и го замолил да скокне – 42 часа откако бил заробен во лифтот.

Оттогаш болницата објави предупредување надвор од лифтот во кое ги замолува луѓето да не го користат додека се поправа.