Данската фондација „Правда за играчите“ поднесе колективна кривична тужба против ФИФА и пет други фудбалски организации, повикувајќи се на пресуда на Европскиот суд на правдата со која се утврдени сериозни прекршувања на работничките и пазарните права.

Во тужбата, поднесена во име на дури 100.000 професионални фудбалери, фондацијата бара отштета за сите играчи кои можеби изгубиле дел од својот приход или заработка поради рестриктивни правила за трансфери и раскинување на договори.

Фондацијата ги повика сите фудбалери кои играле во Европската Унија или Обединетото Кралство од 2002 година да се приклучат на колективната тужба, која има силна правна основа во пресудата на Европскиот суд на правдата донесена минатата година.

❗️ Demandan a FIFA en nombre de 100.000 futbolistashttps://t.co/5AHE2ppyZ5

— Mundo Deportivo (@mundodeportivo) August 4, 2025

Пресудата утврди дека ФИФА со години го кршела законот за конкуренција на ЕУ и го ограничувала слободното движење на работниците. Пресудата се базира на случајот на поранешниот играч на Реал Мадрид, Ласана Диара, чиј трансфер од рускиот клуб Локомотив во белгискиот клуб Шарлроа беше блокиран од ФИФА.

Европскиот суд на правдата пресуди дека правилата на ФИФА за раскинување на договори се нелегални бидејќи ги спречуваат играчите да го напуштат клубот без „оправдана причина“, што директно ги крши основните работнички права на ЕУ.

Фондацијата вели дека целта на тужбата е да се обесштетат сите играчи на кои им е ограничена заработката и правото на слободно движење поради рестриктивните правила на ФИФА.