Габриел Мартинели верува дека дојде моментот за европска слава за Арсенал. Во пресрет на првото полуфинале против Пари Сен Жермен во фудбалската Лига на шампионите, бразилскиот крилен напаѓач на прес-конференцијата пред натпреварот изјави дека „топџиите“ го заслужуваат трофејот што им бегаше со години.

Денеска од 21.00 часот на стадионот „Емирати“ во Лондон ќе се игра мечот помеѓу Арсенал и ПСЖ.

– Ова е најголемиот натпревар во мојот живот. Сонував за овој момент уште од пет или шест години. Заслужуваме да бидеме тука, секој што го сака фудбалот сака да игра вакви натпревари. Мораме да уживаме во моментот и да бидеме подготвени.

Заслужуваме да освоиме нешто за овој голем клуб. Имаме неверојатна можност и ќе излеземе таму верувајќи дека можеме да го направиме тоа. Имаме сон – клубот никогаш не го освоил овој трофеј и го заслужуваме затоа што сме еден од најголемите клубови во светот – рече Мартинели.

И покрај слабиот настап во Премиер лигата и губењето на титулата од Ливерпул, Арсенал импресионира во Европа. Откако го елиминираа Реал Мадрид во четвртфиналето, тимот на Микел Артета се подготвува за своето прво полуфинале во Лигата на шампионите од 2009 година.

Мартинели потпиша на „Сантијаго Бернабеу“ и продолжи чудна серија – Арсенал никогаш не загубил натпревар во кој тој постигнал гол. Досега тој постигна 50 голови за англискиот клуб.