Фудбалскиот клуб Арсенал денеска го претстави своето второ засилување во летниот преоден рок, шпанскиот репрезентативец Мартин Зубименди.

Зубименди доаѓа во Арсенал од Реал Сосиедад, каде што одигра 236 натпревари за сениорскиот тим, откако помина низ младинскиот систем на клубот од Сан Себастијан.

Арсенал ја активираше неговата откупна клаузула од 60 милиони евра, а менаџерот на екипата Микел Артета доби одлично засилување, како замена за Томас Парти.

– Ова е голем момент во мојата кариера. Ова е чекор што со нетрпение го очекувам и сакам да го направам. Од моментот кога пристигнав тука, сфатив колку голем клуб е ова. Се свртев кон Арсенал, бидејќи нивниот стил на игра ми одговара. Најдоброто допрва доаѓа – рече Зубименди по потпишувањето на договорот.

Зубименди го доби дресот со број 36 во лондонскиот клуб. Тој е второто летно засилување што го претстави Арсенал, по Кепа Аризабалага.