Oд 12 до 14 јули по 46-ти пат во Галичник ќе се одржи традиционалната културно-сценска манифестација Галичка свадба, додека годинешните невеста и младоженец, Марина Петровска и Огнен Караѓозевски ќе ја овековечат нивната љубов.

Како што изјави Александар Костиќ од организацискиот тим на Месната заедница Галичник на денешната прес-конференција во Скопје, свадбата ќе биде проследена со свадбарски обичаи и ритуали, народните носии и изворни песни од овие краеви на земјава и се очекува присуството на илјада посетители од земјава и странство. Покровител на годинешната Галичка свадба е претседателот Стево Пендаровски.

– Галичката свадба е светски позната и призната културна и туристичка манифестација, која придонесува за промоција на нашата земја и на сите нејзини убавини. Како организатори на манифестацијата пособено сме задоволни што и годинава на најдобар можен начин ја продолжуваме вековната традиција на Мијаците, како дел од македонското културно богатство. Тоа, како и се поголемиот број на посетители на оваа манифестација, за сите нас претставува дополнителен мотив да продолжиме да вложуваме максимални напори да ја одржиме и постојано да ја збогатуваме – посочи Костиќ.

Ламбро Патче од „Пивара Скопје“, партнер на манифестацијата, им честита на младенците и наздрави за нивната љубов, среќа и бериќет.

– Гордни сме што веќе 46 години во континуитет сме неизоставен дел од оваа уникатна манифестација која е огледало на нашата богата традиција и културно наследство. Им честитам на младенците за нивната среќа и берикет, но и за пријателство и заедништво кои не поврзуваат и зближуваат. Тоа е исто она заедништво, иднина, пријателство, дружење како најисконска сила која ги поврзува во Галичник сите оние кои се од Галичник, но и оние кои се намирници и сакаат да го видат Галичник и нашата богата традиција – појасни Патче.

Тој додаде дека традицијата постоела со векови и треба со голем ентузијазам таа да се пренесува на следните генерации, да ги видат оние автентични ора, обичаи, традиција, адети, нардно носиик, галички специјалитети и архитектурата која се гнездила во Бистра.

Покровител на годинешната Галичка свадба е Претседателот Стево Пендаровски.

Како и секоја година, почетокот на годинешната Галичка свадба ќе биде означен в сабота, на 13-ти јули, со поставување на свадбарското знаме и симболичниот чин на „фрлање“ три пушки од куќата на зетот. Венчавањето на младенците ќе се изврши в недела, во храмот „Св. Апостол Петар и Павле“ во Галичник, а свеченоста ќе заврши со чинот на испраќање на тапанџиите и зурлаџиите.

Традиционално, со одржувањето на Галичката свадба ќе се означи и почетокот на „Галичкото културно лето“, кое и овојпат се очекува да понуди најразлични забавни и музички содржини, прилагодени за сите генерации посетители.

За да можат сите посетители да уживаат во убавината и автентичноста на годинешната Галичка свадба, во деновите на одржување на манифестацијата, особено в недела, ќе биде воспоставен специјален сообраќаен режим, за кој организаторите апелираат доследно да се почитува. Кон ваквиот апел се приклучи и претставникот на Пивара Скопје кој ги повика сите посетители да консумираат алкохол одговорно, да возат безбедно и да се грижат максимално за одржување на чистата природа во Галичник и неговата околина.