Еден од најперспективните македонски кошаркари во моментов, Марин Петков (21 год, 192 см), најмалку до 2027 година ќе го носи дресот на МЗТ Скопје Аеродром, откако денеска го продолжи договорот на уште дополнителни две сезони.

Тој лани дојде во македонскиот шампион кога потпиша двегодишна соработка, а управата на клубот реши да го „врзе“ на подолг период без да чека да му заврши актуелниот договор.

Причина за тоа е вербата во неговиот талент и квалитет, заедно со очекувањата дека во блиска иднина ќе биде еден од носителите на играта на „сино-белите“.

Петков минатата сезона настапи на 13 средби во АБА2-лигата на кои доби десетина минути во просек да покаже што знае, додека во домашното првенство одигра 30 средби со просек од 5,3 поени и 2,7 асистенции.

Како дел од подготовките за новата сезона најавено е дека МЗТ ќе настапи на силен турнир во Кина (27 август – 1 септември).

Летово нови играчи на тимот станаа Американецот Брандон Слај и Србинот роден во БиХ, Милош Копривица, додека соработката со клубот ја продолжија и Хрватот Марко Бакович и браќата Дамјан и Војдан Стојановски. Договор имаат уште и Бојан Крстевски, Андреј Андоноски и Марко Миловановиќ.