Министерот за правда Бојан Маричиќ изрази задоволство и им честиташе на сите институции и поединци кои учествуваа во спроведување на пописот кој завршува денеска во 20 часот.

-Тешка и сложена операција првпат по 20 години, правена по нова методологија на ЕУРОСТАТ и технолошки со таблети и лаптопи, а не како порано на хартија. Навистина имаше многу политички проблеми, технички и хакерски напади кои за среќа успешно ги надминавме. До крајот на денот, до 20 часот ќе добиеме информација од ДЗС дека пописот е успешно завршен. Секако ќе има одредена фаза на проверка на определени податоци и информации кои се внесени, дали се точни или не се. Има и период од 6 месеци да се сумираат податоците, и некаде во март-април ќе ги добиеме податоците, вели Маричиќ.

Тој нагласи дека по завршувањето на пописот останува можноста за самопопишување која постоеше и досега, а податоците ќе бидат допроверени, корегирани.

-Официјално пописот завршува вечерва во 20 часот. Има одреден период од неколку дена за да се дозаврши. Масовното попишување завршува денес. Само Левица помасовно повикуваше на бојкот. Евидентирани се тие луѓе. Има податоци за нив од другите 7 регистри така што ќе бидат внесени во базите. Малку се на број што одбија, по законот се пропишани глоби и казни и дали ќе бидат казнети зависи од Државниот завод за статистика. До вчера се попишани 1,9 милиони граѓани, рече Маричиќ.

Тој нагласи дека треба време за обработка зошто станува збор за обемен материјал и база на податоци.

-Порано една година траел процесот на сумирање на податоци. Сега имаме електронска база и двојно се скратува времето на објавување на податоците. Има податоци кои треба да се корегираат, адреса или работно место. Сепак,  не може секој да има пристап до таа база која допрва треба да се провери и има дупло попишани лица, кои треба да се прочистат. Може да протекуваат информации, но официјалните информации ќе бидат објавени шест месеци од сега, дециден е министерот.