Во новата „Мамавизија“ ви носиме вистинска приказна за мајка странец во Македонија. Филипинката Кристи Рејчел Магно Трајкоски е мајка на Кристофер и Бјанка. Таа е вистинска хероина која поради љубовта го напуштила родниот крај и одлучила да живее во туѓа земја за којашто дотогаш не ни чула – Македонија. Денес Македонија за неа е дом.

Нивната љубов има кодно име „брод“. Зошто? Бидејќи со нејзиниот сопруг Бојан од Македонски Брод се запознале работејќи на истиот брод закотвен во Америка. Па така, Филипинка и Македонец од брод се преселуваат во Македонски Брод. Таму живеат неколку години.
Мајката хероина Кристи вели дека не ѝ било лесно на почетокот кога се преселила овде, бидејќи не го знаела јазикот, не познавала никого освен сопругот и неговото семејство.

-Од милионски град како Манила јас се преселив во мало место со неколку илјади жители. На почетокот ми беше многу чудно и тешко ми беше да се навикнам, но постепено ја засакав таа природа и мир. По две години се роди Кристофер, тогаш животот ми се промени и доби смисла. Полека почнав да го разбирам и македонскиот јазик, ги запознав и луѓето, дури почнав да организирам и одредени настани. Многу ми се допаѓаат луѓето од Македонски Брод. Кога дојде ред Кристофер да се запише на училиште одлучивме да се преселиме во Скопје, поголем град со повеќе можности – вели за „Мамавизија“ Трајкоски.

Таа ни раскажа дека е многу интересно како нивните деца ги добиле имињата.

-Кога живеевме на брод Бојан секогаш ме задеваше и ми го менуваше името, како што правите тука вие на галено, па често ме викаше Кристофер. Еднаш, се сеќавам му реков: „ОК, кога ќе имаме бебе ќе го крстиме Кристофер“. Бјанка, пак го доби името на тој начин што баравме женско име со првата буква на татковото име, Бојан – вели нашата соговорничка.

Таа во емисијата раскажува и за тоа колку ѝ била интересна македонската свадба, за тоа дека со второто дете се породила предвреме, но и за доброто искуство со докторите овде во Македонија. Ни открива дека во текот на бременоста ѝ недостасувала храната карактеристична за нејзиното поднебје.
Денес таа е натурализираната Македонка која има лична карта, пасош и возачка дозвола издадени од МВР на Македонија.

Дознајте повеќе за животот на една мајка странец во Македонија, од вечерашната гостинка на Александра Вуксановиќ, водител и автор на емисијата „Мамавизија“. Десеттата епизода се емитува премиерно вечерва со почеток во 20 часот на јутјуб-каналот на „Слободен печат“.