Второто дополнето издание на книгата „Портрети на злосторниците, Јасеновац – балкански Аушвиц“, на македонски и англиски јазик, испишана од авторите Иван Бабановски, Самуел Колономос Садикарио и Мартин Димковски Бабагинин имаше промоција на 29 мај во салата на Кинотеката на Македонија во Скопје.

На промоцијата говореше геополитичкиот аналитичар и дипломат Емилија Александар Гелева, која истакна дека се работи за значајни нови и малку познати документи и факти, кои се изнесени во книгата. Особено за прикриваните детали за монструозните злосторства извршени од усташите врз невини цивили, жени, деца и старци, претежно Срби, Евреи и Роми.

Во книгата, истакнува таа, д-р Садикарио наведува: „Она што го гледаме на филмовите и го читаме за еврејскиот холокауст е само дел од вистината“. Авторот додаде: „…ви говорам, ние немаме поим за правата вистина. А, другите народи? Дали се знае за Русите, Полјаците, Србите и многу останати кои се убивани по систем ’кому иде‘? Можеби тоа и била целта на нацизмот – да се уништат непожелните!“

Од друга страна, бројките за жртвите од Втората светска војна укажуваат дека креаторите на нацифашизмот и на војната ги таргетираат, пред сѐ Славјаните (Русите), чиј број на воени и цивилни жртви изнесува 27 милиони. И покрај огромниот број жртви, СССР беше тој што го порази фашизмот и нацистите, а западните сојузници САД и Англија дојдоа за „сликање“ при крајот да се покажат дека се на победничката страна.

Според бројот на жртвите, непожелните за креаторите на војната или за нацистите се Словените и Евреите. За тоа кои биле непожелните, истакнува Гелева, пишува проф. Бабановски. Тој во неговите анализи и приложени документи ќе го истакне геополитичкиот аспект на нацифашизмот и на „непожелните“, наведувајќи го записот на Ален Далес, долгогодишен директор на ЦИА, дека „Словените со војна не можете да ги победите. Ќе им дадеме лажни идеали и тие самите себеси ќе се уништат“.

(Текстот е објавен во „Културен печат“ број 285, во печатеното издание на весникот „Слободен печат“ на 14-15.6.2025)