Македонските одбојкари поразени и од Шпанија, наредна цел е Европското првенство 2026
Најдобрата македонска одбојкарска машка репрезентација во вториот натпревар од третиот турнир во Осиек, Хрватска, во рамките од Европската златна лига претрпе пораз од Шпанија со резултат 3:1 во сетови.
Препорачано
Првиот сет им припадна на избраниците на селекторот Хари Наковски со 25:17. Но, во следните три сета Шпанците беа подобри и сите ги добија со ист резултат 25:22.
Во нашата селекција најефикасен беше Н. Ѓоргиев со 29 поени, а на спротивната страна четири помалку запиша Жорди Рамон Ферагут.
Најдобрите македонски одбојкари во Европската златна лига одигра шест натпревари, на трите турнири што се организираа во Струмица, Беверен и Осиек имаа учинок од една победа и пет порази.
Европска златна лига 2024
Резултати –
Македонија – Естонија 1:3
Македонија – Чешка 0:3
Македонија – Азербејџан 3:0
Македонија – Белгија 2:3
Македонија – Хрватска 2:3
Македонија – Шпанија 1:3
И пред настапот во Европската златна лига, репрезентацијата најавуваше дека приоритет ќе бидат квалификациите за пласман на Европското првенство во 2026 година. Македонија е во група со Грузија и со Грција, во август ќе гостуваме кај Грузијците и ќе играме дома против Грците, што значи дека уште по тие два меча може да се случи „црвено-жолтите“ да направат значаен, можеби и клучен чекор кон четврти настап на континенталните собири едноподруго.
Квалификации за Европско првенство 2026
17/18.08.2024 Грузија – МАКЕДОНИЈА
25.08.2024 МАКЕДОНИЈА – Грција
– Го одигравме и последниот натпревар против репрезентацијата на Шпанија. Во овој меч пропуштивме многу шанси против ривал кој беше по мерка да го совладаме, но дали нè стигна заморот и од неконцентрација на приемот, на крајот не успеавме да победиме. Натпреварот заврши 3:1, резултатски некако можам да бидам задоволен, но од играта можевме многу подобро – вели селекторот Наковски.
Воглавно Наковски верува дека играта на нашата репрезентација оди во подобар правец и дека квалитетот доаѓа до поголем израз. Фокусот е сега пласман на следното Европското првенство, а одбојкарите треба да имаат нов собир на 15 јули.
