Четвртиот ден од месец ноември беше предвиден и за официјален почеток на мини-подготовките на македонската женска сениорска кошаркарска репрезентација.

А селекторот Александар Ашаданов и неговиот асистент Атанас Димов, на денешниот првиот тренинг дочекаа 10 кошаркарки: Анџелика Митрашиновиќ, Илина Селцова, Мерит Хемпе, Милица Николиќ, Нена Трајчевска, Ивана Кметовска, Катерина Поп-Димитровска, Ања Начевска и Михаела Алексовска.

На тренингот во салата на СРЦ „Кале“ – Скопје присуствуваше и Матеја Николиќ, која се пожали на болки во пределот на коленото, па ќе треба да оди на дополнителни лекарски прегледи за да се утврди за што станува збор.

– Очекувам веќе на вечерашниот тренинг да бидеме комплетни. Односно да ги имаме на располагање сите 12 кошаркарки. Елена Тасевска имаше обврски на факултетот, додека Александра Стојановска поради транспортните конекции, ќе биде во Скопје попладнево, и ќе биде на тренинг уште вечерва – појаснува Ашаданов.

Нашата селекција во рамките од квалификациите за Евробаскетот 2025 година, на 7 ноември (18.00 часот) ќе биде домаќин домаќин на репрезентацијата на Украина, a три дена подоцна, во истиот термин, во СРЦ „Кале“ го дочекува составот на Португалија.

– Секој циклус е сличен на претходните. Исклучок не е ни овој ноемвриски прозорец на ФИБА. Во овие неколку тренинзи ќе се обидеме да ја поставиме нашата игра, да ги анализираме противниците. Прв противник ни е Украина, селекција со која не сме се сретнале во изминатите години, додека многу повеќе податоци, извесно, имаме за Португалките. Целта останува иста, да се обидеме сите заедно да дојдеме до некоја победа, ќе ни значи многу на сите нас – вели селекторот по првиот одработен тренинг пред овој квалификациски циклус.