Граѓаните нема да имаат можност да изберат која вакцина ќе ја примат за ковид-19 во Македонија, произлегува од одговорот на Министерството за здравство на нашето прашање дали ќе може граѓанинот самиот да одлучи за производителот чија вакцина ќе ја прими како заштита од опасната болест.

Во писмото што државава го доби од Ковакс механизмот, наведено е дека во нашата земја прво ќе стигне вакцината на производителот Фајзер, а во понатамошните пратки можно е преку ковакс да ја добиеме и вакцината на Астра Зенека.

„Вакцините против ковид-19 се безбедни, тестирани, проверени и развиени на безбеден начин, исто како и сите други вакцини кои денес ги користиме. Апсолутно нема никаков ризик од вацинацијата и Министерството за здравство апелира индицираните групи да ја примат вакцината. Примарна цел на вакцинацијата е заштита на населението и пред се намалување на евентуален смртен исход од заболувањето со ковид. Искуството од почетокот на пандемијата покажа дека повозрасните граѓани и хронично болните се во голем ризик и тие би требало први да се вакцинираат и во голем број. Министерството за здравство во директни преговори со производителот Фајзер обезбеди 800.000 од нивните вакцини. Во писмото кое го доби од Ковакс механизмот, е наведено дека во нашата земја прво ќе стигне вакцината на прозводителот Фајзер, во понатамошните пратки можно е преку ковакс да ја добиеме и вакцината на Астра Зенека“, ни одговорија од Министерството за здравство.

Според статистиките на Министерството за здравство, 60 проценти од здравствените работници би се вакцинирале против ковид-19. Доколку се вакцинираат здравствените работници тоа ќе влее голема доверба кај граѓаните. Првите 5.860 дози од фајзеровата вакцина ќе пристигнат во февруари.Во март треба да стигнат уште 17.550 и уште најмалку толку во април.

Се очекува датум кога ќе пристигнат и 833 илјади дози преку ковакс механизмот. Први ќе се вакцинираат здравствените работници, повозрасните лица и хронично болните, а потоа сите граѓани. Вакцината ќе биде бесплатна за сите.