Македонската кошаркарска репрезентација „Под 20“ го освои сребрениот медал на Европското првенство дивизија „Б“ кое се одржуваше во Скопје.

Во големото финале во СЦ „Борис Трајковски“ нашиот младински национален тим загуби од Чешка со 72:85.

По победата во полуфиналето над Украина, избраниците на селекторот Никола Василев ја остварија целта со враќање во елитната „А“ дивизија.

По завршувањето на финалниот меч, чешкиот репрезентативец Ондреј Свец беше прогласен за највреден играч на континенталниот собир (МВП).

Во идеалната петорка на ЕП се најде репрезентативецот на Македонија, Теодор Симиќ, центарот во просек имаше 16.0 поени, 9,1 скокови, 2,9 асистенции и 1,1 блокада по меч.

Покрај Симиќ, во најдобрата петорка се и Ондреј Свец (Чешка), Олександр Кобзистји (Украина), Феликс Бростром (Шведска) и Ондреј Хустак (Чешка).