Она што во петокот го најави претседателот на македонската кошаркарска федерација, Перо Антиќ, на прес-конференцијата одржана во хотелот „Парк“, се исполни веќе во попладневните часови – Коста Ќириловски стана нов член на Игокеа.

Како што информираат од федерацијата, босанскиот клуб, кој се натпреварува во регионалната АБА лига покажа интерес за македонскиот репрезентативец.

Ќириловски ова изминато лето со јуниорската репрезентација го освои првото место на младинскиот Евробаскет, одржан во Скопје, за кошаркари до 18 години.

Ќириловски, кој последните шест години ги помина во дресот на Водно Санс, е втор репрезентативец на Македонија кој ќе заигра во дресот на Игокеа, по Теодор Симиќ кој стана дел од овој клуб во 2022 година.