Македонски автори влегоа во селекцијата за Европските филмски награди
Долгометражниот игран филм „Најсреќниот човек на светот“ на македонската режисерка Теона Стругар Митевска влезе во селекцијата за Европските филмски награди (ЕФА).
Препорачано
Филмот е сниман на локации во Скопје и во Сараево по сценарио на Елма Татарагиќ. Од македонските актери, во филмот играат Ана Костовска, Николина Кујача и Лабина Митевска, додека главните улоги ги толкуваат Јелена Кордиќ-Курет и Аднан Омеровиќ, а играат и Фирдауз Неби, Џевдет Јашари и Зорица Нушева од Македонија во низа епизодни улоги заедно со Ксенија Маринковиќ од Хрватска, Изудин Бајровиќ, Ирма Алимановиќ, Ведрана Божиновиќ, Мона Муратовиќ, Синиша Видовиќ, Кемал Ризвановиќ од БиХ.
Снимањето на филмот „Најсреќниот човек на светот“ беше поддржано од Агенцијата за филм на РСМ во 2020 година.
Во селекцијата за Европските филмски награди влезе и грчкиот игран филм „Зад стоговите сено“ на младата грчка режисерка Асимина Проедроу, реализиран во копродукција помеѓу Грција, Германија и Северна Македонија. Македонски копродуцент е „Сектор филм“, предводен од продуцентите Владимир Анастасов и Ангела Несторовска.
Избраните филмови ќе бидат земени предвид и за наградите во категориите за најдобра кинематографија, монтажа, продукциски дизајн, костимографија, шминка и фризура, оригинална музика, звук и визуелни ефекти. Доделувањето на „европските Оскари“ е закажано на 9 декември во Берлин.
