Современата уметност во 21 век претрпува голема трансформација со гласовите и перспективите на жените уметници кои играат клучна улога. Шестото издание на „Арс висибилис“ (Ars visibilis), меѓународна изложба на современа уметност на жени уметници што MECA (Медитерански уметнички центар) во Шпанија го развива од 2012 година, е програма што го истакнува талентот и различноста на современите жени уметници на меѓународно ниво.

Шестото издание на „Арс висибилис“ е курирано од Роза Муњоз Бустаманте и Фернандо Барионево и треба да даде одговори за улогата што жените ја заземаат во уметничкиот свет и потребата да се направи видлив нивниот придонес.

Учесници на изложбата се Адел Разкови, Алмудена Тапија Порас, Асунсион Лозано, Кармен Гвардија, Есперанза Ромеро, Герда Ван Дам, Жана Шевалие, Ли Жао, Мар Гаридо, Марија Долорес Галего, МК Балинт, Моника Васкез Ајала, Пандора Апостолоска Саздовска, Реџина Кармона и Тоња Гомез, кои доаѓаат од земјите-учеснички: Шпанија, Австрија, Швајцарија, Белгија, Кина, Франција, Македонија, Бразил, Тајланд и Обединетото Кралство.

Изложбата е поставена во MECA (Медитерански уметнички центар) во Алмерија, Шпанија, а трае од 17 мај до 6 јуни 2024 година.

Пандора Апостолоска Саздовска е визуелен уметник, активист и истражувач. Во 2004 година дипломира на Факултетот за ликовни уметности во Скопје. Уметничката практика на Пандора Апостолоска Саздовска е насочена кон меѓучовечките односи истражувајќи ги аспектите на војната и насилството како политички и социолошки феномен. Нејзините дела се наоѓаат во престижни јавни и приватни колекции, вклучувајќи владини институции, амбасади, музеи и галерии.