Филмската продукција „Три точки“ ја најави македонската премиера на краткометражниот игран филм „Прошетка“ во режија на Елеонора Венинова. Премиерата ќе се одржи на 17 мај (петок), во 20 часот, во „Киноверзум“ во Домот на култура „Билјана Беличанец“ во Кисела Вода.

Снимен во еден кадар, филмот „Прошетка“ ја раскажува приказната за едно девојче кое низ разговор со нејзиниот соговорник се обидува да дознае што се случило со баба ѝ.

Филмот ја имаше светската премиера на престижниот Интернационален филмски фестивал во Леувен, Белгија, американската премиера на „SEEfest“ во Лос Анџелес, а во следниот период следува и премиера на филмот во Шпанија.

Главните улоги во филмот ги играат Билјана Драгичевиќ Пројковска и Надиа Кирковска. Режисерка и сценаристка на филмот е Елеонора Венинова. Кинематографер е Фејми Даут, монтажата е на Гоце Кралевски, композиторка на музиката е Мартина Силјановска, а дизајнер на звук е Дарко Спасовски. Сценографијата е на Александра Петковска, костимографијата на Жаклина Крстевска, а шминката на Ирена Сенокозлиоска. Продуценти се Гоце Кралевски и Елеонора Венинова.

Филмот е продуциран од продукцијата „Три точки“ во соработка со „ДНФ Филмс“ и со поддршка на „Вардар Филм“. Финансиран е од Агенцијата за филм на РС Македонија.