Македонската музичка сцена е во шок по трагичната загуба на Андреј Ѓеоргиески, пејачот на дуото „ДНК“, кој го загуби животот во катастрофалниот пожар во дискотеката „Пулс“ во Кочани. Според информации на повеќе медиуми, 43-годишниот музичар подлегнал на повредите, откако храбро се обидувал да им помогне на гостите во моментите кога огнот се проширил низ клубот.

Првично, неговото семејство и пријателите објавуваа апели за негово пронаоѓање, но сега пристигна веста дека трагично настрадал.

Неговите пријатели, колеги и обожаватели се простуваат од него со емотивни пораки на социјалните мрежи.

Водителката и инфлуенсерка Миа Костова со болка напиша: „Срце планина. Си ја отпеа. Траор, ужас, пекол од ден.“

Пејачката Тамара Тодевска се присети на неговата автентична енергија: „Ти беше најголем мангуп од сите. Срце планина. Толку искрен и реален. Ретко кој можеше да те сфати. Секогаш ќе те паметам по твојата насмевка и блесава смисла за хумор. Патувај и пеј таму горе.“

Со тага се збогува и Антониа Гиговска, која во една од неговите песни пеела придружни вокали: „Голем човек, големо срце, голема загуба. Почивај во мир, добро човече. Пеј како што си знаеше ти – најгласно, најубаво. Таму горе. Не сакам да верувам…“

Телевизиската водителка Лила Филиповска, која го нарекуваше кум, со скршено срце напиша: „Куме мој. Навикната бев да ви ги споделувам новите песни и спотови на ДНК со години наназад. Никогаш не помислив дека сега ќе споделам ваква тажна, претажна вест. Кога ми ја пушти песната ‘Ако утре ме нема’, ти реков дека многу ми се ‘свиѓа’ без да помислам дека таа песна ти ја претскажа тажната судбина. Те нема веќе куме, ама само физички… во срцата на оние кои те сакаат ќе те има засекогаш. Летај куме, летај со ангелите и чувај нѐ од горе, а ние вечно ќе те паметиме и ќе ни фалиш.“

 

View this post on Instagram

 

A post shared by Lila (@lilafilipovska)

Со неверување и тага, инфлуенсерката Сања Ристиќ напиша: „Другарче, нека ти е светол патот. Да знаев дека последен пат се среќаваме во средата, ќе те гушнев уште посилно. Патувај со ангелите, ќе пееме горе некогаш повторно заедно! Болка до небо. Длабоко сочувство до семејството!“

Да потсетиме, Андреј Ѓеоргиески беше дел од популарното дуо „ДНК“, кое го основа заедно со Владимир Блажев – Панчо во 2001 година. Со музичко образование зад себе, завршено нижо и средно музичко училиште, како и студии на Музичката академија во Скопје, Андреј претходно беше дел од групата „ТНТ“, додека неговиот колега Панчо настапуваше во „ОК Бенд“. Нивниот прв заеднички сингл „Девојка за везден“ брзо стана хит и ги вивна кон врвот на македонската естрада.

Освен него, во пожарот животот го загубија и Сара Пројковска, професорка на Факултетот за музичка уметност и придружен вокал на „ДНК“, тапанарот Ѓорги Ѓоргиев, како и Филип Стевановски, кој исто така беше дел од составот на „ДНК“.

Андреја Ѓорѓиески – Андреј од „ДНК“ трагично го загуби животот во пожарот во Кочани