Данскиот фудбалски клуб Сондерјиске и официјално го ангажираше македонскиот У21 репрезентативец, Иван Николов.

Нашата фудбалска надеж потпиша договор на три години, со важност до летото 2026. Сондерјиске минатата сезона го освои четвртото место во втората данска фудбалска лига.

До сега ги бранеше боите на штипска Брегалница која продолжува со политиката на поддршка на младите фудбалери како клуб кој го гради и овозможува патот кон интернационална кариера за талентите, и продажба на фудбалерите како начин за дополнителен развој на клубот од секој можен аспект.

Централниот играч за врска ќе му биде соиграч на уште еден наш интернационалец во Сондерјиске, Сефер Емини.

– Во Иван Николов добиваме вреден играч за врска со добро око за играта. Тој е редовен во македонските младински репрезентации низ ранговите, а кога е капитен на селекцијата до 21 година, тоа кажува нешто и за неговите квалитети и фудбалски и психички. Го поздравуваме доаѓањето на возбудлив и талентиран играч кој ќе придонесе за нашиот веќе силен среден ред – вели спортскиот директор на данскиот клуб Сондерјиске, Есбен Хансен.