Современиот руски писател Владислав Отрошенко од 23 до 27 октомври е гостин на издавачката куќа „Македоника литера“, која на 24 и 25 октомври го промовираше македонското издание на неговиот роман „Додаток за фотоалбум“ во Скопје и во Битола. Промотор на романот е Венко Андоновски, кој е автор и на поговорот во романот.

Романот претставува фасцинантна приказна за една куќа во која живее семејството на чичковците родени со бакенбарди, раскажана со суптилен хумор, со двосмисленост и со виртуозно преплетување на фантазмагоријата, митот и реалноста, па затоа и е наречена „најфантазмагоричната семејна хроника напишана на руски јазик“.

– Отрошенко пародира не само наративни конвенции, туку и цели откршоци од културни текстови, семиотички мрежи од цели култури! Едноставно, овој вулкан од писател не остава недопрена ниедна конвенција во својата експериментална лабораторија на романот! Тој е книжевен козак и книжевен бунтовник на 21 век! – напиша Венко Андоновски во поговорот на романот.

Владислав Олегович Отрошенко (1959 година, Новочеркаск, Руска Федерација) дипломирал на Факултетот за новинарство на Московскиот државен универзитет. Член е на меѓународниот ПЕН-центар и на Сојузот на руските писатели. Член е на жирито за книжевната награда „Јасна Полјана“.

Делата на Отрошенко се преведени на 14 јазици. Романот „Додаток за фотоалбум“ е првото негово дело преведено на македонски јазик. Книгата е преведена со финансиска поддршка на Институтот за превод од Москва и на Министерството за култура на РСМ.

(Текстот е објавен во „Културен печат“ број 253, во печатеното издание на весникот „Слободен печат“ на 26-27.10.2024)