Македонските тенисери со пораз го завршија настапот на турнирот од Дејвис купот што се одржа во Скопје, но поразот од Летонија не ја наруши големата радост, пласманот во Втората дивизија, прв по цели две децении.

Во последниот натпревар, Јанев загуби во првиот сингл дуел, но Ивановски со победа донесе израмнување. Сепак, Летонците, кои беа најдобри на турнирот, покажаа квалитет во мечот во двојки, каде Озолинс и Стромбач беа подобри од Ивановски и Мицов. И двата сета завршија со 6-4 во корист на Летонија, откако македонската двојка по еднаш го загуби својот сервис во двата сета.

Летонија заврши прва на табелата со пет победи од исто толку натпревари, пред Црна Гора со четири триумфи и еден пораз. Македонија со три победи и два порази го освои третото место, последното што води во повисок ранг.

Зад Македонија останаа репрезентациите на Молдавија, Малта и Ерменија. За македонскиот тим, ова е историски успех и враќање во Втората дивизија по 20 години чекање.

Црна Гора ни заврши работа: Македонија веќе е во Втората дивизија од Дејвис купот!