В сабота во Белград, Србија ќе се одржи Балканско првенство во атлетика во сала на кое Македонија ќе биде застапена со двајца атлетичари.

Во скок во далечина ќе настапи Андреас Трајковски од АК Работнички и во трката на 400 метри Јован Стојоски од АК Охрид.

Ова ќе биде трето учество на Трајковски за македонската репрезентација на Балканијада во сала.

Трајковски во 2022 година го освои бронзениот медал со скок од 7,62 метри, додека во 2024 се закити со сребрениот медал со скок од 7,79 метри што е актуелен македонски рекорд во сала.

Оваа сезона Трајковски е во одлична форма, негов најдобар скок сезонава е 7,72 метри, со што може да се надева дека повторно ќе се вмеша во борбата за медал.

Натпреварувањето во скок во далечина утре ќе стартува од 16.10 часот, а во конкуренција се 15 атлетичари.