„Мавровски меморијал“ е спортска манифестација која го промовира едно од најубавите туристички атракции, Маврово. Натпреварот се одржува во спомен на 38. градители на електро системот Мавровка и 14 храбри граничари, кои го загубија животот во снежната лавина 1956 година.

Оваа година настанот ќе се одржи од 24-26 февруари на патеката Мирна долина, во Маврово, 57 ми пат по ред, информираат од Агенцијата за млади и спорт.

На прес-конференцијата организирана во Агенцијата за млади и спорт зборуваше директорот Дарко Каевски, како и претставници од одборот за реализација на настанот.

– Овој настан се наоѓа на светската мапа за нордиско трчање. и затоа и оваа година ќе се потрудиме да оставиме впечаток на добри домаќини и организатори, и да го направиме овој ФИС натпревар еден од најдобро организираните меѓународни настани на Балканот – рече Каевски.

Тој додаде дека АМС како и секоја година претходно, така и овој пат, финансиски и логистички ќе ја поддржи организацијата на овој меѓународен, традиционален настан, кој првата реализација ја имаше далечната 1962 година.

На прес конференцијата зборуваше претседателот на Мавровскиот меморијал, Кочо Кирацов, како и селекторот на македонската репрезентација во нордиско трчање Ѓоко Диневски. Освен македонските претставници, свој настап ќе имаат натпреварувачи од Србија, Црна Гора, БиХ, Хрватска, Грција, Турција, Бугарија, а за прв пат имаме натпреварувачи од Швајцарија и Русија.

Во извонредно силната конкуренција, нашата репрезентација ќе настапи со 10 натпреварувачи, во чиј состав е секако и нашиот најдобар нордиец Ставре Јада, кој ќе има прилика да го потврди евидентниот напредок од последното Светско јуниорско првенство.