Македонија може да побара компензација од Бугарија само ако претрпела штета, дециден е бугарскиот министер за финансии Асен Василев. Тој на посебен брифинг во Министерството за финансии, соопшти дека „за да поднесете барање за отштета, мора да сте претрпеле штета“, објави БНТ. Ваквата реакција доаѓа откако министерот за економија Крешник Бектеши, изјави дека Бугарија не може да воведе еднострана такса за рускиот гас што преку нејзината територија стигнува до соседните земји, вклучително и до нас. Уцени во делот на начинот како Македонија ќе ги инвестира и диверзифицира своите извори, не се прифатливи од никого, појасни Бектеши и најави дека се известени Европската енергетска заедница и ЕУ и ќе бараме да нè заштитат.

„Не гледам никаква штета. Данокот не го поскапува гасот за овие земји, бидејќи нивните договори се за испорака во соодветната земја. Тоа само го намалува профитот на „Гаспром“, додал Василев, пренесува „Сегабгњус“. Претседателот на Бугарија, Румен Радев во четвртокот пред тамошниот Уставен суд, ја оспори владината одлука за воведување на данок за руски гас кој поминува низ територијата на Бугарија. Како што објавија бугарските медиуми, во барањето до Судот, Радев навел дека со „одлуката се прекршени голем број одредби содржани во бугарскиот устав, како и дека се прекршени принципите на гарантирање на правото на сопственост и слободната економска иницијатива“. Коментирајќи го барањето на Радев до Уставниот суд, министерот Василев, изјави дека „претседателот не го штител бугарскиот интерес, туку интересот на Руската Федерација“.

Треба да се напомене дека критики за начинот на наплата на новиот „енергетски придонес“ изразија и ГЕРБ и ДПС, иако гласаа за оваа законска измена.

-Се покажа дека претседателот Радев ја префрли таксата наметната за трансферот на рускиот гас до Уставниот суд на Република Бугарија. Тоа нема да го спречи спроведувањето на законот. Таксата е изгласана на 13 октомври и ги очекуваме првите пари од 14 ноември годинава. Она што изненадува е што претседателот не го штити националниот интерес на Бугарија, или барем не како што јас го разбирам. Национален интерес е на Бугарија, не на Русија, не на „Гаспром“. Со оваа постапка претседателот се појави како бранител од интересите на Газпром, ова е срам за претседателската институција – реагираше бугарскиот министер за финансии.

Во истиот дух се огласи и премиерот Николај Денков. Од Брисел на новинарите им порача дека со овој чин претседателот не ги штити интересите на Бугарија. „Можеби ги штити интересите на другите земји – Русија, Унгарија, Србија, но не ги штити бугарските интереси“, категоричен беше Денков, објавуваат бугарските медиуми.

Регулативата што Бугарија ја усвои пред неколку денови и која веднаш стапи во сила, предвидува такса од 10,76 долари за мегаватчас руски природен гас испорачани преку гасоводот „Турски поток“ на територијата на таа земја.

Во законот оваа такса е дефинирана како „придонес за енергија“. Со тоа, како што пишуваат бугарските медиуми, би се обезбедил приход од 1,3 милијарди евра и ќе се исплатат трошоците за изградба на гасоводот низ Бугарија за една година. Турски поток“ снабдува неколку земји од источна Европа со руски гас. Србија, Унгарија и Северна Македонија остро реагираа против новиот данок, бидејќи очекуваат нагло зголемување на цената на рускиот гас што им се доставува. Бугарската влада уверува дека таксата треба да ја плати „Гаспром“, а не крајните примачи.

Со тоа ќе се намали профитот на руската гасна компанија и финансирањето на војната во Украина, а во исто време ќе донесе дополнителен приход во бугарскиот буџет.

Пријателскиот договор меѓу Македонија и Бугарија предвидува поддршка од нашиот источен сосед како земја аспирант за ЕУ, што, пак, од друга страна се коси со воведувањето нови давачки, кои ќе значат дополнителни трошоци за македонските граѓани. „Гаспром“ дневно испорачува 41,8 милиони кубни гас за Европа преку Украина, преку гасната станица „Суја“ во руската област Курск. Транзитната линија низ Украина останува единствената рута за снабдување на земјите од Западна и Централна Европа со руски гас, бидејќи целосно е прекинато пумпањето низ Северен тек.

 Компаниите кои ја користат бугарската мрежа треба да докажат дека гасот не е руски!

Сите компании кои ја користат бугарската мрежа за пренос на гас се информирани за режимот со кој треба да докажат дали гасот доаѓа од Русија. Ако не е руски – ќе бидат ослободени од трансферната такса од 10 долари за мегават час, објасни бугарскиот министер за финансии Асен Василев.

-Доколку „Гаспром“ одбие да ја плати транзитната такса, ги имаме сите алатки за да воведеме мерки на претпазливост како заплена на имот и други ресурси – рече Василев. Тој прецизираше дека банкарските гаранции најчесто се активираат во случај на неисполнување на обврските. „Гаспром“ дал банкарски гаранции, кои може да ги искористи доколку одбијат да платат, посочи Василев.