Во Брисел вчера се одржа средба на високи владини претставници од Македонија и Бугарија, на која било договорено да се дефинираат техничките, финансиските и оперативните аспекти на проектот за изградбата на железничкиот Коридор 8. Двете земји се договорија да го финализираат текстот на договорот за изградбата на железничкиот Коридор 8 до крајот на јули, со што се отвора патот за почеток на градежните работи во 2026 година.

Исто така, се разговарало за содржината и потпишувањето на договорот оваа есен со што би се отворил патот за започнување на градежни работи на почетокот на следната година.

На состанокот присуствувале Државниот секретар на Министерството за транспорт на Македонија, Стефан Волкановски, директорот на ЈП Железници Инфраструктура, Синиша Ивановски, заменик-министерот за транспорт и врски на Бугарија, Љубен Нанов, а во организација на Валентина Суперти, директор за Западен Балкан во Директоратот за проширување и Источно соседство (ДГ ЕНЕСТ).

Како што информираат од Министерството за транспорт, состанокот се одржал во позитивна и конструктивна атмосфера, како продолжение на последниот состанок во октомври 2024 година, при што биле разменети мислења и се потврдила посветеноста и потребата кон финализација на делот од железничкиот коридор 8.

„Во однос на заедничкиот проект за изградба на прекуграничниот тунел помеѓу Ѓуешево и Деве Баир, двете страни се договориле да формираат работни групи кои до крајот на месец јули ќе го финализираат текстот на меѓувладиниот Договор со цел да се утврдат конкретните обврски на двете страни за техничките, финансиските, градежните и оперативните аспекти“ соопшти министерството.

Двете страни изразиле подготвеност за заедничко аплицирање за финансиска поддршка од ЕУ и меѓународни партнери, со цел обезбедување средства за реализација на овој стратешки проект. Европската Инвестициска Банка која исто така беше дел од средбата понуди своја подготвеност да помогне во техничките дискусии и да помогне во целокупниот процес.

Договорени се чекорите во следните месеци, при што биле идентификувани приоритети меѓу кои и повторно објавување на тендерот за работите на железничкиот дел помеѓу Крива Паланка и влезот на прекуграничниот тунел до крајот на 2025 година од страна на Македонија.

Од Министерството посочуваат дека се разговарало и за активностите од бугарската страна и активностите што ги преземаат во делот на железницата.

И двете страни изминатиот период меѓусебно се обвинуваа за блокада на изградбата на железничката пруга на Коридорот 8.

Источниот дел од Коридор 8 ги поврзува Македонија и Бугарија и е дел од Европскиот транспортен коридор Западен Балкан – Источен Медитеран.