Македонија денеска платила аванс за 833.000 дози на анти-ковид вакцина
Ќе има доволно дози на вакцини за населението. Државата нема да штеди пари за набавка на вакцини, порача вечерва премиерот Зоран Заев.
Препорачано
На гостувањето во емисијата „Топ тема” на телевизија Телма, премиерот соопшти дека денеска е платен авансот за 833.000 вакцини кои ќе бидат набавени преку Ковакс системот, а обезбедена е и гаранцијата за останатиот дел од парите што треба да се платат по пристигнувањето на вакцините.
– Денес на Влада мина обезбедувањето на гаранцијата која по пат на јавна аукција ја понудија повеќе банки. Победи Комерцијална банка со најниска провизија за останатите седум и пол милиони евра кои ќе треба да ги доплаќаме кога ќе стигнат вакцините. Организирани се и најмалку девет фирми кои ги имаат обезбедено сите услови за чување на вакцините, рече Заев.
Освен преку Ковакс системот, побарани се и 800.000 вакцини од 100-те милиони вакцини што Европската Унија (ЕУ) ги набавува за земјите од Европа кои не се членки на Унијата, а одредена количина, премиерот очекува и од Грција, која, како што рече, набавила вакцини за себе, но и за Северна Македонија и за Албанија.
Вакцинирањето ќе оди оди исто како и во останатите држави – прво здравствените работници, повозрасните граѓани и хронично болните.
– За нас е многу важно кога вакцината ќе стигне во Европа, да стигне и кај нас, нагласи Заев во интервјуто за телевизија Телма.
