Македонија без Кристијан Николов против Норвешка и Данска во Гевгелија
Машката сениорска репрезентација на Македонија денеска во Гевгелија, ги стартува мини-подготовките за претквалификациските натпревари за Европското првенство 2025 кои следуваат во ноемврискиот ФИБА „прозорец“.
Препорачано
Селекторот Александар Јончевски имаше проблеми околу формирањето на конечната листа на кандидати на која првично беа поставени 14 кошаркари. Во последен момент, од списокот на патници за Гевгелија и конкуренција за мечевите против Норвешка и Данска, поради повреда отпадна Кристијан Николов.
– За жал нема да бидам во можност да им помогнам на своите репрезентативни соиграчи на овие два натпревари. Имам повреда, односно скршеница на палецот на десната рака, тоа го потврдија и првите снимки. Во петок имам уште една лекарска контрола со која докторите треба да ја одредат дефинитивната слика и да почна со рехабилитацијата. Извесно е дека ќе бидам надвор од теренот во наредните четири недели. Ќе видиме понатаму, се надевам дека сè ќе биде во најдобар ред. Ќе бидам најголем навивач на нашата репрезентација на средбите со Норвешка и со Данска. И се надевам дека ќе ја продолжиме успешната серија и во овој прозорец на патот кон евро-квалификациите – вели Николов од Турција.
Согласно со планираното, во салата „26 април“, каде ќе ги играме натпреварите со двете селекции од Скандинавија, „црвено-жолтите“ ќе одработат седум тренинзи. По денешниот закажан за 18.00 часот, во вторник следуваат уште два, од 10.00 до 11.30 часот и од 18.00 до 19.30 часот.
Во истите термини ќе бидат и тренинзите на 9 ноември во среда, а нашите најдобри кошаркари ќе тренираат и на денот на првиот натпревар, во четврток, од 10.00 до 11.00 часот.
СПИСОК НА ИГРАЧИ НА МАШКА СЕНИОРСКА РЕПРЕЗЕНТАЦИЈА НА МАКЕДОНИЈА
(ЗА НОЕМВРИСКИ КВАЛИФИКАЦИСКИ ЦИКЛУС ЗА ЕВРОБАСКЕТ 2025)
Бобан Стајиќ (Пелистер)
Андреј Магдевски (МЗТ Скопје Аеродром)
Војдан Стојановски (МЗТ Скопје Аеродром)
Адем Мекиќ (МЗТ Скопје Аеродром)
Дамјан Робев (МЗТ Скопје Аеродром)
Бојан Крстевски (МЗТ Скопје Аеродром)
Виктор Ефремовски (Гостивар)
Андреј Маслинко (Гостивар)
Страхил Николов (ТФТ)
Амар Хот (Феникс 2010)
Стојан Ѓуроски (Оуренсе – Шпанија)
Теодор Симиќ (Борац Бања Лука-БиХ)
Ти-Џеј Шортс (Телеком Бон-Германија)
ВИДЕО: Новиот македонски кошаркарски репрезентативец е најдобриот стрелец во Бундеслигата
