Во вторникот селекторот на македонската А репрезентација, Благоја Милевски го објави списокот на фудбалери на кои ќе смета за натпреварите од Лига на нации против Грузија на 23 септември во Тбилиси и Бугарија во Скопје на 26 септември.

Селекторот на прес-конференција изјави дека се соочува со многу проблеми и непланирани работи што се однесува до здравствената состојба и формата на неколку фудбалери.

Милевски рече дека има проблеми со Дарко Чурлинов кој треба да оди на дополнителни прегледи, по што ќе се знае состојбата на играчот и се надеваше дека ништо не е сериозно.

Нашето 22-годишно крило не беше во составот на Винсен Компани за синоќешниот натпревар од англискиот Чемпионшип против Престон (1:1). Менаџерот на Барнли потврди дека Чурлинов има повреда.

– Нема да кажам што точно, но за жал мислиме дека ќе треба да помине некое време – се зборовите на Компани.

Од Фудбалската федерација на Македонија потврдија дека Чурлинов нема да биде во составот за дуелите против Грузија и Бугарија.

– Лекарските прегледи потврдија дека напаѓачот на англиски Барнли не е во можност да му помогне на репрезентативниот тим за претстојните мечеви поради повреда на задниот бутен мускул – информираат од ФФМ.

Милевски најверојатно не планира да повика ново име во репрезентацијата, има 26 играчи на располагање за новите натпревари во Лигата на нации.