Македонскиот државјанин кој минатата недела бил најден мртов на улица во Љубљана бил од Кочани на возраст од 39 години, а амбасадата на Македонија во Словенија е во контакт со неговото семејство и словенечките институции за пренесување на неговото тело. 

– Ве информираме дека до Амбасадата на Република Северна Македонија во Љубљана е доставено известување дека во текот на ноќта на 2 октомври 2025 година, животот го загубил македонски државјанин, роден во 1986 година во Кочани. Согласно информациите од словенечката полиција, блиските на починатиот се веќе известени, а случајот го разгледува Секторот за криминалистичка полиција. Амбасадата на Република Северна Македонија во Љубљана е во контакт со семејството на починатиот и со надлежните словенечки институции, со цел обезбедување на потребната конзуларна поддршка и следење на понатамошниот тек на постапката – соопшти Министерството за надворешни работи откако во словенечките медиуми беше пренесена веста.

Како што објави словенечкиот портал „24ur.com“ неговото тело било пронајдено во центарот на градот во четвртокот наутро, а како што информира портпаролката на Полициската управа во Љубљана, Шпела Шкопорц, станува збор за 38-годишен маж од Македонија.

Според неофицијални информации на порталот, тој бил претепан до смрт, но полицијата сè уште не го потврдила тоа.